‘काणी नव्या युगाची’ नाटकाच्या पयल्याच प्रयोगाक बरो प्रतिसाद

भांगरभूंय | प्रतिनिधी

सुचिता नार्वेंकाराचें हें नाटक नव्या शिक्षण धोरणाचेर आधारीत

फोंडें: कला चेतना वळवय निर्मीत आनी राजदीप नायक प्रस्तूत ‘काणी नव्या युगाची’ ह्या नाटकाच्या पयल्याच प्रयोगाक नाट्य रसिकां कडल्यान बरो प्रतिसाद मेळ्ळो. 

ह्या वेळार लेखिका सुचिता नार्वेंकार हांच्या नव्या शिक्षण धोरणाचेर आधारीत ‘काणी नव्या युगाची’ कोंकणी नाटकाचो राजीव कला मंदिरांत शिक्षण तज्ञांचे हाजेरींत येसस्वी प्रयोग जालो. देशांत वट्ट 36 वर्सां उपरांत शिक्षणीक धोरणांत बदल घडटा. स्वातंत्र्या उपरांत शिक्षणीक मळार दुसरे फावट हो बदल आशिल्ल्यान नवें माध्यम, नवी पद्धत, नवें तंत्रज्ञान हाचो विचार करून केल्लो हो बदल दरेका पालका मेरेन सादे सोंपे भाशेंत नाटका वरवीं पावचो ह्या हेतान कला चेतना वळवय हे संस्थेन ह्या नाटकाची निर्मिती केल्या. गोंयच्या ज्वलंत विशयाचेर विनोदी नवें नाटक सादर करपी कला चेतना हे संस्थेन अंदूं ‘नॅशनल अ‍ॅज्युकेशन पॉलिसी’ विशयाचेर ह्या नाटकाचो प्रयोग फोंडेंच्या राजीव कला मंदिरांत सादर केलो. 

ह्या प्रयोगाक गोंय शिक्षण खात्याचे संचालक शैलेश झिंगडे, शिक्षण तज्ज्ञ डॉ. नारायण देसाय, रवींद्र केळेकार, मडगांव मंदिराचे मुख्यद्यापक अनंत अग्नी, सत्तरीचे शिक्षक झिलू गांवकार, समीर प्रभू आनी गोंयच्या खूबश्या शिक्षण मळावेले मानेस्त हजर आशिल्ले. 

   नवें धोरण दरेका पालका मेरेन ह्या नाटका वरवीं बरे तरेन पावतलें, असो विश्वास शिक्षण संचालक झींगडे हांणी उक्तायलो. जाल्यार शिक्षण तज्ञ डॉ. देसाय हांणी दरेका पालकान हें नाटक पळोवपाचें आवाहन केलें. गोंयच्या पालक शिक्षक संघान ह्या नाटकाचें आयोजन करून दरेका पालकां मेरेन ह्या नाटका वरवीं जागृताय करची, अशी मागणी हजर आशिल्ल्या मानेस्तांनी केली. 

ह्या नाटकाची लेखन सुचिता नार्वेंकार हांणी केलां. सुशांत नायक हांणी ह्या नाटकाचें दिग्दर्शन केलें. नेपथ्य हेमंत कांसार, जाल्यार संगीत आनी गायन गोंयचे नामनेचे गायक अक्षय नायक हांणी केलां.ह्या नाटकांत मुखेल भुमिकेंत वासंती फेम राजदीप नायक आशिल्ल्यान तांचे वांगडा राजेश प्यारेलाल, सुचिता नार्वेंकार, मोहनदास नायक, रामानंद नायक, प्रशांती चारी आनी निगम नायक हे कलाकार आसा. ह्या नाटकाचे तीन थियेटर प्रयोग जातले. 21 ऑक्टोबराक रवींद्र भवन सांखळे, 22 ऑक्टोंबर रवींद्र भवन, मडगांव, जाल्यार 30 ऑक्टोंबर रवींद्र भवन कुडचडें हांगा रातच्या 7.30 वरांचेर हे प्रयोग जातले.

विनोदी स्वरूपाच्या ह्या नाटकाची भुरगीं, तरणाटीं आनी जाणटीं अश्या सगळ्या गटांत गृहीत धरून निर्मिती केल्या. नवें एनईपी म्हळ्यार कितें हें समजून घेवपाक दरेकान ह्या नाटकाचो एकदां तरी आस्वाद घेवपाचें आवाहन संस्थेन केलां.