भांगरभूंय | प्रतिनिधी
भांगरभूंय । प्रतिनिधी
काणकोणः विद्यार्थ्यांक मदले सुटयेच्या खाणाची पुरवण करपी आप मजत पंगडान तें दिवपाचें अकस्मात बंद केल्ल्यान काणकोण तालुक्यांतल्या खोला, आगोंदा, गांवडोंगरी आनी खोतीगांवच्या सुमार दोन हजार विद्यार्थ्यांक फाटल्या कांय दिसां सावन हें खाण मेळना. आम आदमी पक्षान हे खाण दिवपाची तयारी दाखयल्या आनी तशें निवेदन काणकोणच्या एडीआयक दिला. सरकार दिता त्या दरांत मदले सुटयेंतले खाण दिवप परवडान म्हणून आप मजत पंगडान तें फाटल्याा बारा दिसां सावन बंद केला.
मेळिल्ले म्हायती प्रमाण दर विद्यार्थ्या फाटल्यान मदले सुटयेच्या खाणा खातीर 6.11 रुपया दिता. खाण तयार करून शाळांनी व्हरून ताची पुरवण करपाक सरकार दिता त्या पयशां परस चड खर्च येता. मजुरी आनी येरादारी हाच्या खर्चाचो ताळमेळ बसना म्हणून आप मजत पंगडान तें तयार करून दिवपाचें बंद केलां. काणकोणच्या एडीआय कडेन हें संबंदी विचारलें तेन्ना ताणी शिक्षण खाते तशेंच काणकोणचो आमदार आनी सभापती रमेश तवडकार हाची मदलें सुटयेंतलें खाण तयार करून दिवप आप मजत पंगडान बंद केला हाची म्हायती दिल्या मात अजून ताचेर तोडगो काडिल्लो ना अशें तांणी सांगलें.
विद्यार्थ्यांक उपाशी रावचें पडचें न्हय हे खातीर ताची पुरवण करपाची तयारी आमी दाखयल्या. एडीआयन आमका तशें निवेदन सादर करपाक सांगलां आनी तें दितले अशें आम आदमी पक्षाचो उपाध्यक्ष संदेश तळेकार हांणी पत्रकारांक सांगले. एडीआयन विद्यार्थ्यांक मदले सुटयेंत कितें खाण दिवपाक जाय ताची वळेरी आमकां दिल्यार ताची आमी पुरवण करपाची तयारी दाखयल्या अशें तांणी सांगलें. सरकारान विद्यार्थ्यांक पुश्ठीक आहार दिवपाक जाय. मात सरकार दिता त्या मोलांत तो दिवप शक्य ना ही गजाल आमी एडीआयचे नदरेक हाडून दिल्या अशी म्हायती तांणी दिली. सरकारान खाणा खातीर दितात त्या मोलांत वाड केल्यार लोक तशेंच आप मजत पंगड तें काम घेवपाक तयार जातले अशेंय तळेकार हांणी सांगलें.
मदले सुटयेंतलें खाण दिवप अकस्मात बंद केल्ल्यान गांवडोंगरी, खोतीगांव आनी खोला हांच्या पालकांनी आनी विद्यार्थ्यांनी सरकाराचेर टिका करपाक सुरवात केल्या. आमच्या पालकांक सकाळीं उठून आमकां टिफीन करून दिवप शक्य ना. फाटल्या बारा दिसां सावन आमकां उपाशी रावचें पडटा अशें कांय विद्यार्थ्यांनी सांगलें. सरकारी आनी खाजगी शाळांनी मदले सुटयेंतलें खाण दिवप सक्तीचें करपाची मागणी कांय पालकांनी केल्या.
सरकारान मदले सुटयतलें खाण दिवपाक सुरवात केली तेन्ना 6.11 रुपया हो दर पुरवण करतल्यांनी मानून घेतिल्लो. तेन्ना चणे 19 रुपया किलो आशिल्ले. सध्या हो दर 100 रुपयांचेर पावला अशें आप मजत पंगडांतल्या एका वांगड्यान सांगलें. सामाजीक भावनेतल्यान ऑक्टोबर मेरेन लुकसाण सोसून आमी खाण करून दिलें आतां मात तें शक्य ना अशें तांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
