भांगरभूंय | प्रतिनिधी
दिवाळे आदीं पालिका वाठारांतल्या सगल्या रस्त्यांचेर लायटीः गांवकार
भांगरभूंय । प्रतिनिधी
काणकोणः काणकोण दर्यादेगेचेर वेवसाय करपी वेवसायिकांनी पालिकेचो परवानो घेतले बगर वेवसाय सुरू केलो जाल्यार खर कारवाय करतले, अशी शिटकावणी नगराध्यक्ष रमाकांत गांवकार हांणी दिले उपरांत पालिकेंत परवान्यां खातीर गर्दी जावपाक लागल्या.
ह्या वेवसायांतल्यान पालिकेक सादारणपणान 87 लाख इतलो महसूल मेळटा, अशी म्हायती नगराध्यक्ष गांवकार हांणी दिल्या.
काणकोण पालिका आपल्या कामगारांचो पगार दिवपाक समर्थ आसा. काणकोण पालिकेक दर मोसमांत शॅका फाटल्यान 15 हजार रुपया जाल्यार दर तंबू फाटल्यान 5500 रुपया फी मेळटा. तशेंच 15 हजार रुपया सुरक्षा हमी म्हूण घेतात. काणकोण पालिकेंत वट्ट 40 कामगार आसात, अशीय म्हायती नगराध्यक्ष गांवकार हांणी दिली. पालिका वाठारांतल्या सगळ्या वॉर्डांतलीं गटारां नितळ केल्यात. ह्या वावराक 1263 कामगार लागले. तांचेर 8 लाख 84 हजार रुपया खर्च केल्यात. हे कामगार हेर वाठारांतल्यान हाडचे पडले. पालिका वाठारांतलो किंदळे रस्तो आनी चावडी ते राजबाग तारीर मेरेनच्या रस्त्याचें हॉटमिक्स डांबरीकरण रोखडेंच सुरू जातलें. 15 ऑक्टोबरा सावन हॉटमिक्स प्लांट चालीक लागतलो. फुडल्या दोन म्हयन्यांत हें डांबरीकरण पुराय जातलें. दिवाळे आदीं पालिका वाठारांतल्या सगल्या रस्त्यां वयल्यो लायटी पेट्टल्यो, अशें नगराध्यक्ष गांवकार हांणी स्पश्ट केलें.
पालिकेक जाय पूर्णवेळ मुख्याधिकारी, अभियंतो…
पालिका वाठारांतल्या सगळ्या घरांचें सर्व्हेक्षण करून घरपट्टी वाडोवची, असो थाराव खूब वर्सां आदीं घेतिल्लो. मात ताची कार्यवाही अजून जावंक ना. पालिका वाठारांतलीं घरां आनी वेवसायीक आस्थापनीं हांकां वेगवेगळो दर सरकारान घालून दिला. ही सगळी प्रक्रिया पुराय करचे खातीर पालिके कडेन पूर्णवेळ मुख्याधिकारी आनी पूर्णवेळ अभियंतो ना. मुख्याधिकारी आनी अभियंतो सप्तकांतले फक्त दोनूच दीस उपलब्ध आसतात. ताका लागून प्रशासकीय कामकाजाचेर परिणाम जाता, अश्यो कागाळी पालिका वाठारांतल्या लोकांच्यो वाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
