भांगरभूंय | प्रतिनिधी
भांगरभूंय । प्रतिनिधी
काणकोणः काणकोण तें माशें मजजगीच्या मनोहर पर्रीकार बायपास रस्त्यार जीव घेवपी अपघाताक राज्य सरकार आनी कंत्राटदार जापसालदार आसात. ताच्या बांदकामाची चवकशी करपाची मागणी प्रदेश काँग्रेस समितीचो सरचिटणीस जर्नादन भंडारी हांणी केल्या. हे विशीं तांणी केंद्रीय येरादारी आनी म्हामार्ग मंत्री नितीन गडकरी, मुख्यमंत्री डॉ प्रमोद सावंत आनी बांदकाम मंत्री नीलेश काब्राल हांका पत्रां बरयल्यांत.
काणकोणचो काँग्रेस परिवार आनी जनसेवा वॉरियर्स हांणी ह्या बायपासाच्या बांदकामा आड आवाज उठयल्लो. राष्ट्रीय म्हामार्ग प्राधिकरणाकडेन ताची फाटपुरवण केल्ली. मात ताची कोणेय दखल घेतली ना, अशें भंडारी हांणी सांगलें. रस्त्याचें काम जाय त्या दर्जाचें जावंक नाशिल्ल्यान अपघात जावंन जायत्या जाणांक जीव वोगडावचे पडल्यात. राजबाग, काणकोण आनी तोरशे- पत्रादेवी हांगां हालिसाराक जाल्ले अपघात हे खातीर सरकार तशेंच कंत्राटदारा आड कारवाक करची अशें भंडारी हांणी नितीन गडकीर हांका बरयल्ल्या पत्रांत म्हणलां. राजगाब हांका जाल्ल्या अपघातांत वास्कोंतल्या आनी तोरशें हांगा जाल्ल्या अपघातांत पुण्यांतल्या कुटूंबातल्या लोकांक मरण आयलें. कंत्राटदार बऱ्या दर्जाचें काम करनात आनी सराकार ताचे कडेन लक्ष दिना असो आरोप भंडारी हांणी केला.
मनोहर पर्रीकार बायपास रस्त्याचो खर्च 190 कोटी वयल्यान 290 कोटींचेर कित्याक पावला तशेंच तो बांदपाक कळाव कित्याक जालो हाची चवकशी जावपाक जाय अशें भंडारी हांणी पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
