भांगरभूंय | प्रतिनिधी
कुटुंबीक वादांतल्यान प्रकरण घडिल्ल्याचो पुलिसांक दुबाव
म्हापशें: सांता क्रुझ वाडो – ओर्डा, कांदोळे बापायन आपल्या भुरग्यांचो गळो अंदून खून केले उपरांत स्वता गोळ घेवन आत्महत्या केली. मयतां मदीं जॉय साल्वादोर फर्नांडीस (47) हो बापूय जाल्यार एन्नालीस जॉय फर्नांडीस (13) आनी जोजफ जॉय फर्नांडीस (8) ह्या भुरग्यांचो आस्पाव आसा. घोव-बायले मदल्या कुटुंबीक वादांतल्यान हें प्रकरण घडलां आसुये अशी शक्यताय कळंगूट पुलिसांनी उक्तायल्या. मजगतीं. पुलीस निरिक्षक किशोर रमाणन हांचे कागाळीच्या आदारान मयत जॉय फर्नांडीस हाचे आड दोनूय भुरग्यांचो गळो अंदून खून केल्ल्याच्या आरोपा खाला पुलिसांनी खुनाचो गुन्यांव नोंद केला.ही घडणूक शेनवारा रातीं उक्तडार आयली. मयत जॉय हांची घरकान्न इरिनिया फर्नांडीस ही वाड्या वयल्या शेजारच्या लग्न सुवाळ्यांत दनपारां गेल्ली. चर्चींत लग्न सुवाळो जाले उपरांत ती सांजवेळा 5.30 वरांचेर घरा परतली. घराच्या मुखेल दाराक कुलप लायिल्लें. भुरगीं आनी घरकार भायर बी सरल्यात आसतलीं म्हणून ती घरच्या व्हरांड्यांत बसून रावली.
उपरांत काळोख जालो तरी घरांतल्यो लायटी सुरूच आशिल्ल्यो. तशेंच एसी लेगीत सुरू आशिल्लो. भायर सरता आसतना ते लायटी आनी एसी चालूच दवरून बी गेल्यांत आसतलीं अशें तिका दिसलें. तशेंच वाड्या वयले सोयरे आनी सगलेच लोक लग्न सुवाळ्याक गेल्ले.
रातच्या 10 वरांच्या सुमाराक तिचो देर आनी शेजारचे लोक घरा परतले, तेन्ना तिणें भुरगीं आनी घरकार नाशिल्ल्याचें सांगलें. उपरांत त्या दोगांनी घराचे फाटले वटेन धांव घेतली. दारा भायली लोखंडाची गेट तांणी मोडून भितर प्रवेश केलो आनी दार उगडून घरांत प्रवेश केलो. तेन्ना मयत जॉय फर्नांडीस हांच्या बॅडरुमांतले खाटीर दोनूय भुरगीं मरण अवस्थेंत पडिल्ल्याचें दिसून आयलें. तशेंच जॉय घरांत नाशिल्लो. भुरग्यांची गळो अंदून हत्या केल्ल्याचें दिसतालें.
हे घडणुकेची म्हायती कळंगूट पुलिसांक 10.30 वरांचेर दिली तेन्ना पुलीस निरिक्षक दत्तगुरू सावंत आनी वांगडी पुलिसांनी घडणूक थळार धांव घेतली. तशेंच पुलीस अधिक्षक निधीन वाल्सन आनी उपअधिक्षक विश्वेश कर्पे हांणी घडणूक थळाक भेट दिवन पळोवणी केली. घडणुकेचो पंचनामो करून पुलिसांनी दोनूय कुडी गोमॅकाँत धाडून दिल्यो.
दोनूय भुरगीं मरण अवस्थेंत पडिल्ल्याचें पळोवन आवय इरिनिया फर्नांडीस हांकां धक्कोच बसलो आनी ती बेशुद्ध पडली. पिशे लागिल्ले भशेन बडबडूंक लागली. तिका कुटुंबान आनी शेजाऱ्यांनी आधार दिलो.
मयत भुरग्यांचो बापूय बेपत्ता आशिल्ल्यान ताची सोद मोहीम पुलिसांनी रातभर राबयली. पूण तो खंयच सांपडलो ना. कारण भुरग्यांची हत्या करपाचें कारण तोच दिवंक शकतालो.
आयतारा सकाळीं 10 वरांच्या सुमाराक मयतांचो बापूय जॉय फर्नांडीस हाची कूड घरा फाटल्यान अदमाशेक 50 मिटराचेर रानांतल्या एका झाडाक हुमकळत आशिल्ल्याची दिसून आयली. ताची भावज घराचे फाटले वटेन गेल्ली तेन्ना तिका कूड हुमकळत आशिल्ल्याचें दिसून आयलें. पुलिसांनी उजो पालोवपी दळाचे मजतीन कूड सकयल देंवयली आनी गोमॅकाँत धाडून दिली.
मयताच्या शर्टाच्या बोल्सांत घराच्या मुखेल दाराच्या कुलपाची चावी सांपडली. ताका लागून तांणीच घराक कुलप लावन ही आत्महत्या केली आसुये असो दुबाव पुलिसांनी उक्तायला. हे घडणुकेची म्हायती मेळटकूच पुलीस उपमहानिरिक्षक बॉस्को जॉर्ज हांणी घडणूक थळाक भेट दिली आनी पुलिसां कडल्यान घडणुकेची म्हायती मेळयली तशेंच तपासकामा विशीं गरजेच्यो सुचोवण्यो केल्यो.
मजगतीं, ह्या तिनूय कुडींचेर गोमॅकाँत मरणा उपरांतची तपासणी जाली. दोनूय भुरग्यांचो खून गळो अंदून जाल्ल्याचें ह्या अहवालांतल्यान स्पश्ट जालां. जाल्यार बापूय जॉय हाणें आत्महत्या केल्ल्याचें म्हणलां. ह्या प्रकरणांत पुलिसांनी रातीं उसरां खून आनी आत्महत्येचो गुन्यांव नोंद करून फुडलो तपास पुलीस निरिक्षक दत्तगुरू सावंत करतात.
बेपत्ता जॉय हांची कूड सांपडिल्ल्यान तांणीच पयली भुरग्यांचो खून केलो आनी उपरांत आत्महत्या केल्ल्याचें पयले पळोवणेंत दिसून येता. पूण मयताची घरकान्न सांजवेळा 5.30 वरांचेर परतली आनी ही घडणूक रातच्या 10.30 वरांचेर उक्तडार आयली. ती घरा आयली तेन्ना घराक कुलप आशिल्लें. भुरग्यांचो आनी घरकाराचो मोबायल लेगीत लागनाशिल्लो. अशा वेळार तांची वाट पळयत सुमार पांच वरां घरा भायर कशी रावली. तांचो सोद तिणें कित्याक केलो ना अशे दुबावाचे प्रस्न उप्रासल्यात, ते नदरेन पुलीस तपास करतात.
भुरग्यांची कूड पळोव सैरभैर जाल्ल्यो इरिनिया फर्नांडीस हांचे भलायकेंत सुदारणा जाले उपरांत आयतारा सांजवेळा पुलिसांनी तिची जबानी नोंद करून घेतल्या. हे जबानीची आनी घडणूक थळा वयल्यान मेळिल्ले म्हायतीची शाहनिशा पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
