भांगरभूंय | प्रतिनिधी
डॉ. भट्टाचार्य: केपें सरकारी महाविद्यालयांत रंगलें कवी संमेलन
पणजी: कविता थारावन बरोवन येना. कविता आपसूक सुचता आनी कसली तरी घडणूक कविता बरोवपाक स्फूर्त दिता अशें केपेंच्या सरकारी महाविद्यालयाचे प्राचार्य डॉ. जॉयदीप भट्टाचार्य हांणी सांगलें.
केपेंच्या सरकारी महाविद्यालयाच्या एम. ए. कोंकणी विभागाच्या कोंकणी अभ्यास मंडळान हालींच शिक्षकां खातीर भौभाशीक कवी संमेलन आयोजीत केल्लें. ह्या सुवाळ्याच्या उक्तावणा वेळार प्राचार्य डॉ. भट्टाचार्य उलयताले.
भौभाशीक कवी संमेलनांत कोंकणी, मराठी, हिंदी आनी इंग्लीश ह्या भाशांनी कविता सादर जाल्यो. कोंकणी, इंग्लीश, मराठी, हिंदी, कॅमेस्ट्री, झूओलॉजी, बायोलॉजी, मॅथेमॅटिक्स, कॉमर्स अशा वेगवेगळ्या विभागांतल्या सुमार 20 शिक्षकांनी आपल्यो कविता सादर केल्यो.
कार्यावळीचे सुरवातेक एम. ए. कोंकणी विभागाच्या विद्यार्थ्यांनी तयार केल्ल्या वणटीपत्रकाचें प्राचार्य डॉ. जॉयदीप भट्टाचार्य हांणी लोकार्पण केलें.
सुवाळ्याक कोंकणी विभाग मुखेल प्रो. डॉ. राजय पवार, हिंदी विभाग मुखेल डॉ. ब्रिजपाल सिंग, कोंकणी अभ्यास मंडळाचें अध्यक्ष रिमी वाझ, मंडळाचें सचीव सुचिता बांदेकार आनी मंडळाचें भांडारी मेल्विटा फेर्नांडीस हाजीर आशिल्लीं.
भौभाशीक कवी संमेलनाचें सुत्रसंचालन केदार सावंत हांणी केलें. मंडळाचे अध्यक्ष रिमी वाझ हांणी सगळ्यांक येवकार दिलो. मंडळाचे सचीव सुचिता बांदेकार हांणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
