भांगरभूंय | प्रतिनिधी
क्षेत्रीय अधिकार समितीचाे निर्णय;
कर्नाटका कडल्यान मागल्या स्पश्टीकरण
भांगरभूंय I प्रतिनिधी
पणजी : पर्यावरण मंत्रालयाच्या क्षेत्रीय अधिकार समितीचे बसकेंत मंजुरी खातीर आयिल्लो कळसा प्रकल्पाचो प्रस्ताव फुडें धुकल्ला. सुक्या वाठारांत वनीकरणा खातीरची येवजण तशेंच हो प्रकल्प व्याघ्र कॉरिडॉरांत येत आशिल्ल्यान गरजेचें ते उपाय करपा विशीं सविस्तर म्हायती दिवपाचे निर्देश समितीन कर्नाटकाक दिल्यात.
पर्यावरण मंत्रालयाच्या क्षेत्रीय अधिकार समितीची बसका हालींच कर्नाटकांतल्या बंगळुरूंत जाली. हे बसकेंत कर्नाटकान कळसा प्रकल्पाचो प्रस्ताव मंजुरी खातीर हाडिल्लो. जलतंटा लवादान कळसा नाल्याचेें 1.72 टीएमसी उदक घुंवडावपाक मान्यताय दिल्या. हुबळी, धारवाड तशेंच आशिकुशीच्या लोकांक पियेवपाच्या उदका खातीर ह्या प्रकल्पाचे नियोजन करतात असो दावो कर्नाटकान प्रस्तावांत केल्लो. ह्या प्रस्तावाचेर समितीच्या सगल्याच वांगड्यांनी मतां मांडले उपरांत हो प्रस्ताव सध्या स्थगीत दवरपाचो निर्णय घेतला.
कर्नाटकान कळसा कानालाचें नियोजन ज्या वाठारांत केला, ताच्या अाशिकुशीच्या सुक्या वाठारांत वनीकरणा खातीर कितें येवजण्यो आंखल्यात, तशेंच हो प्रकल्प व्याघ्र कॉरिडॉरांत येत आशिल्ल्यान थंय गरजेच्यो सगल्यो उपाय येवजण्यो राबोवपा विशीं कशे तरेन नियोजन केला, हाची सविस्तर म्हायती दिवपाचे निर्देश समितीन कर्नाटकाक दिल्यात.
कर्नाटकाची फटींगपणां उक्ताडार हाडटलेंः पांगम
पर्यावरण मंत्रालयाच्या क्षेत्रीय अधिकार समितीन कर्नाटका कडेन कळसा प्रकल्पा संदर्भांतल्या जायत्या गजालींचे स्पश्टीकरण मागिल्लें. तातूंत कर्नाटकान हो प्रकल्प फक्त पियेवपाच्या उदका खातीर आशिल्ल्याची तशेंच भीमगड अभयारण्याचीं चुकीचीं म्हायती दिल्या. ताका लागुनूच राज्य सरकार फुडल्या कांय दिसांत क्षेत्रीय अधिकार समितीक पत्र धाडून कर्नाटकाचीं फटींगपणां उक्ताडार हाडटले, अशें अॅडव्होकेट जनरल देविदास पांगम हांणी आमच्या प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
