भांगरभूंय | प्रतिनिधी
तीन वांगड्यांची समिती स्थापन, 60 दिसांत अहवाल दिवपाची सुचोवणी
पणजी : कला अकादमीच्या नुतनीकरण कंत्राटाचें मुल्यांकन करपाचो निर्णय राज्य सरकारान घेतला. ते खातीर डॉ. आशिष रेगे, संदीप प्रभू चोडणेंकार आनी डॉ. के. जी. गुप्ता हांची तीन वांगड्यांची समितीय स्थापन केल्या. हे समितीक 60 दिसांत अहवाल सादर करपाची सुचोवणी दिल्या.
मुल्यांकना खातीर स्थापन केल्ले समितीन कला अकादमीच्या नुतनीकरण कामां कडेन संबंदींत सगले दस्तावेज, रेकॉर्ड एकठांय करून तांची चवकशी करची. ते संबंदीचो अहवाल 60 दिसांत सरकाराक सादर करचो, अशेंय सरकारान म्हणलां.
कला अकादमीच्या नुतनीकरणाचें कंत्राट निविदा मागयनासतना राज्य मंत्रीमंडळाचे मान्यतायेन टेकटॉन बिल्डकॉन प्रा. लि. कंपनीक 3 मे 2021 दिसा 39 कोटी रुपयांक दिल्लें. पूण ताचेर वेगळेवेगळे कर लायले उपरांत हें काम 56 कोटी रुपयां मेरेन पाविल्ले. हे सुत्र धरून गोवा फॉरवर्डाचे आमदार विजय सरदेसाय हांणी मंत्री गोविंद गावडे हांकां विधानासभा आनी विधानसभे भायरूय आरोप करपाक सुरवात केली. निविदा मागयनासतना काम सुरू करून गावडे हांणी व्हड भ्रश्टाचार केल्ल्याचो दावोय तांणी केलो. विधानसभेच्या पावसाळी अधिवेशनांत हे विशीं जाल्ले चर्चे वेळार मंत्री गावडे हांणी कला अकादमीच्या कामांत कसलोच भ्रश्टाचार जावंक नाशिल्ल्याचे सांगून, शहाँजनान ताजमहालाच्या बांदकामां खातीर निविदा जारी करूंक नाशिल्ल्यो. तरी लेगीत ताजमहाल संवसारांतले सातवें अजाप आसा, असो मुद्दोय मांडिल्लो.
ताचे वयल्यान विधानसभेंत आरोप प्रत्यारोप जाले. सरदेसाय हांणी गावडे हांचो शहाँजहान असो उल्लेख चालूच दवरिल्लो. तशेंच हाचे वयल्यान गावडे हांकां मंत्रीपदा वयल्यान काडपाची मागणी मुख्यमंत्र्या कडेन केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
