भांगरभूंय | प्रतिनिधी
इमारत दुरुस्तीचें काम नोव्हेंबर मेरेन पुराय जावप अशक्यः मंत्री गावडे
भांगरभूंय I प्रतिनिधी
पणजी : कला अकादमी इमारतीचें दुरुस्ती काम नोव्हेंबर मेरेन पुराय जावपाची शक्यताय नाशिल्ल्यान 20 नोव्हेंबर ते 28 नोव्हेंबर मजगतीं जावपी अांतरराष्ट्रीय चित्रपट महोत्सवाक (इफ्फी) कला अकादमी उपलब्ध जावची ना. हाका लागून आयनॉक्स आनी पोरणी गोमॅकॉ इमारत इफ्फीचें मुखेल थळ आसतलें, अशें कला आनी संस्कृती खात्याचे मंत्री गोविंद गावडे हांणी सांगलें.
ऑक्टोबर मेरेन दुरुस्ती काम पुराय करून इफ्फीक कला अकादमी उपलब्ध करपाचे यत्न आसात. सावंड, एकोस्टीक, स्टेज हांचें काम अजून जावंक ना. हाका लागून कला अकादमी इफ्फीक उपलब्ध जावप कठीण आसा.
उजो पालोवपी यंत्रणा बसोवपाचो वावर सुरू आसा. हाचे उपरांत ग्रीन रूम, आर्ट गॅलरी हांचें काम जातलें. सिव्हील काम पुराय जालां. सावंड आनी एकोस्टिक्साचें काम जाले उपरांत तपासणी करपाक वेळ लागतलो. हाका लागून काम केन्ना पुराय जातले, हे विशीं आताच सांगपाक जावचे ना. दरेकी सप्तकाक भौशिक बांधकाम खात्या कडल्यान आपूण कामाचो नियाळ घेता, अशें मंत्री गोविंद गावडे हांणी सांगलें.
चित्रपट महोत्सवाचें उक्तावण आनी समारोपाची कार्यावळ डॉ. श्यामाप्रसाद मुखर्जी स्टेडियमांत जायत आसली तरी कला अकादमी हेंच महोत्सवाचें मुखेल थळ आसता. चित्रपट प्रदर्शना भायर बऱ्योच कार्यावळी कला अकादमींत जातात. कला अकादमी उपलब्ध नाशिल्ल्यान ह्यो कार्यावळी आयनॉक्स कोर्टयार्डांत जातात. अंदूं इफ्फी व्हड दबाज्यान मनयतले.
प्रसार माध्यम नोंदणी ऑक्टोबरांत
अंदूंचो चित्रपट महोत्सव 20 नोव्हेंबर ते 28 नोव्हेंबर मजगतीं जातलो. महोत्सवा खातीर प्रतिनिधी नोंदणी सुरू जाल्या. प्रसारमाध्यम नोंदणी ऑक्टोबर सावन सुरू जातली. फाटलीं दोन वर्सां कोरोनाक लागून इफ्फीचे स्वरूप मर्यादीत आशिल्ले. मास्टर क्लास तशेंच हेर कांय कार्यावळी ओटीटी मंचाच्या आदारान जाल्यो. आयनॉक्स ते कला अकादमी मेरेन स्टॉल्स नाशिल्लें. अंदूं मात कोरोनाची भिरांत नाशिल्ल्यान कार्यावळी पयली भशेन जातल्यो. हाका लागून अंदूं प्रतिनिधी उपस्थिती वाडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
