भांगरभूंय | प्रतिनिधी
दोन बसका उपरांत प्रक्रियाच बंद; कलाकारां मदीं निरशेणी
भांगरभूंय I सिद्धार्थ कांबळे
पणजी : कोरोना काळांत अर्थीक संकश्टांत सांपडिल्ल्या राज्यभरांतल्या कलाकारांक दरेकी पांच ते 10 हजार रुपया मेरेनची अर्थीक मजत दिवपी कला आनी संस्कृती खात्याची येवजण गुठलावपाची शक्यताय आसा. मंत्री गोविंद गावडे हांणी येवजणेची घोशणा केले उपरांत हे विशीं स्थापन केल्ले समितीच्यो फक्त दोन बसका जाल्यात. ते उपरांत वर्स उलगले तरी येवजण अंमलांत हाडपा खातीरची कसलीच प्रक्रिया सरकारा कडल्यान जावंक नाशिल्ल्याचे उक्तें जालां.
देशभरांत कोरोनाचो उद्रेक जाले उपरांत कोरोना प्रसार आडावपाक गोंया सयत देशभरांत मार्च 2020 पसून फुडले कांय म्हयने लॉकडावन लागू केल्लें. ह्या काळांत राज्यांतले सगले उत्सव बंद दवरिल्ले. ताका लागून उत्सवांतल्या सांस्कृतीक कार्यावळी वरवीं पोट भरपी गांवगिऱ्या वाठारांतल्या कलाकारांचेर अर्थीक संकश्ट आयिल्लें. अशा कलाकारांक अर्थीक मजतीचो हात दिवपाक कला आनी संस्कृती मंत्री गोविंद गावडे हांणी राज्यभरांतल्या कलाकारांक दरेकी पांच ते 10 हजार रुपयांची अर्थीक मजत दिवपाची घोशणा केल्ली. येवजण अंमलात हाडपाक 20 जाणांची समिती लेगीत स्थापन केल्ली. हे समितीच्यो फक्त दोन बसका जाल्यो. 7 जुलय दिसा येवजणेच्या मसुद्याचेर म्होर लायिल्ली. मसुद्याक सरकाराची मंजुरी घेवन बेगोबेग येवजण अंमलात हाडटले, अशें मंत्री गावडे हांणी स्पश्ट केल्ले.
पूण ते उपरांत ताचेर कसलीच कार्यवाही जावंक नाशिल्ल्याची म्हायती स्वता कला आनी संस्कृती खात्याचे संचालक सगुण वेळीप हांणी आमच्या प्रतिनिधी कडेन उलयतना दिली.
कलाकार अर्थीक मजत येवजण अंमलात हाडपाक 30 जाणांची मुख्य आनी तातूंतल्या 12 जाणांचो आस्पाव आशिल्ली उपसमितीय स्थापन केल्ली.
कलाकारांचे निकश, अर्ज, अटी तयार करपाचें काम उपसमिती कडेन सोंपयिल्ले. वर्सुकीं देड लाख रुपया उत्पन्न अाशिल्ल्या सगल्या कलाकारांचो येवजणेंत आस्पाव करपाचे निश्चीत जाल्ले.
येवजणेचो लाव दितना कोणाचेरूच अन्याय जावचो ना, अशें मंत्री गावडे जाहीर केल्ले. पूण ते उपरांत जायते म्हयने सरकारा कडल्यान हे येवजणे विशीं कितेंच कार्यवाही जावंक नाशिल्ल्यान कलाकारांनी निरशेवन ओग्गी रावप पसंत केले.
कलाकारांचो डाटा एकठांय करप कठीण
कलाकार अर्थीक मजत येवजणे खातीर ग्रामीण वाठारांतल्या कलाकारांचो डाटा एकठांय करप शक्य जातले. फुडारांत कोरोना सारकी स्थिती निर्माण जाल्यार कलाकारांक मजत दिवपाक ह्या डाटाचो उपेग जातलो, अशें मंत्री गावडे हांणी त्या वेळार म्हणिल्लें. पूण आतां ही येवजणूच गुठलायिल्ल्यान कलाकारांचो डाटा एकठांय करपा खातीर कलाकारांक फुडल्या आपत्तीची वाट पळोवपी पडटली, अशी प्रतिक्रिया कलाकारांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
