भांगरभूंय | प्रतिनिधी
भांगरभूंय। पत्रक
मंगळूरः राष्टीय शिक्षण निती प्रमाण कर्नाटकांतल्या कोंकणी भाशक लोकांक कोंकणी माध्यमांत केजी तें 5वी मेरेन शिक्षण घेवपा खातीर कोंकणींत पाठ्य पुस्तकां तयार करपाक कर्नाटकांतल्या कोंकणी शिक्षण संस्था संघान प्रा. डॉ कस्तुरी मोहन पै, विश्वनाथ भट आनी विजयानंद कामत हांच्या फुडारपणा खाला वेगवेगळया शाळांच्या प्रतिनिधींनी कर्नाटकाचे प्राथमीक आनी प्रौढ शिक्षण मंत्री बी सी नागेश हांची भेट घेतली आनी तांकां निवेदन भेटयलें.
प्रधानमंत्री नरेंद्र मोदी हांणी शिक्षण नितीक प्राधान्य दिलां. कोंकणी पाठ्य पुस्तकां तयार करपाक कर्नाटक सरकार जाय तें सगलें सहकार्य आनी अर्थीक मदत दितले अशें नागेश हांणी सांगलें. कोंकणीत पाठ्य पुस्तकां तयार करपा खातीर 12 शिक्षक आनी 8 कोंकणींत एमए केल्ल्या तज्ज्ञांनी एक समिती स्थापन केल्या. ह्या कामाक गरज पडल्यार गोंय सरकाराच्या शिक्षण खात्याची तशेंच कोंकणी संस्थांची मजत घेतले अशें डॉ पै हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
