भांगरभूंय | प्रतिनिधी
उमेश तळवणेंकारः सरकारी अधिकारी अडवणूक करतात, असो दावो
भांगरभूंय । प्रतिनिधी
पेडणें: पेडणें म्हालांतल्या लोकांक ओबीसी प्रमाणपत्र मेळोवचे खातीर पेडणें सरकारी कार्यालयांत वच्चें पडटा. थंय अधिकारी तांची व्हड प्रमाणांत अडवणूक करतात, असो दावो भोवजन म्हासंघाचे पेडणें अध्यक्ष उमेश तळवणेंकार हांणी केलो. तशेंच सात दिसां भितर सोंपेपणी ओबीसी प्रमाणपत्रां मेळ्ळी नात जाल्यार आपूण कार्यालया मुखार आत्मदहन करतलों, अशी शिटकावणी पेडणें उपजिल्होधिकारी दीपक वायंगणकार हांकां दिली.
पेडणें म्हालांतले विद्यार्थी तशेंच हेरांक सध्या व्हड प्रमाणांत ओबीसी प्रमाणपत्राची विवीध कामां खातीर गरज लागता. ते खातीर ते उपजिल्होधिकारी कार्यालयांत अर्ज करतात. पूण ओबीसी प्रमाणपत्र मेळयतना तांकां व्हड प्रमाणाचेर आडखळी येतात. ते भायर सरकारी अधिकारी सतावणूक करतात, असो दावो वायंगणकार हांणी बुधवारा उपजिल्होधिकाऱ्यां कडेन चर्चा करतना केलो. जर कांय आडखळी आसात जाल्यार त्यो सात दिसां भितर सोडवच्यो आनी आदीं जे पद्दतीन ओबीसी प्रमाणपत्रां दिताले तशींच आतांय दिवचीं. सात दिसां भितर हीं प्रमाणपत्रां सोंपेपणी मेळ्ळी नात जाल्यार आपूण पेडणें उपजिल्होधिकारी कार्यालया मुखार आत्मदहन करतलों, अशी शिटकावणी तांणी दिली. जर एकाद्याच्या आवय- बापायचें 1960 आदींचें जल्म वा मरणपत्र नासल्यार अधिकारी संबंदीत मनशाक ओबीसीचें प्रमाणपत्र दिना. ते भायर एक चवदाचो उतारो दिवपाची मागणी करतात. जांचे कडेन जमिनूच ना तांचे कडेन एक चवदाचो उतारो कसो आसतलो आनी ताका ओबीसीचें प्रमाणपत्र कशें मेळटलें? हे गजालीचो आपूण निशेध करतां. आदीं जे पद्दतीन ओबीसीचीं प्रमाणपत्रां दिताले तशीच तीं आतांय दिवची, अशी मागणी उमेश तळवणेंकार हांणी पत्रकारां कडेन उलयतना केली.
आमदारांनी जनहिता खातीर वावुरचें: तळवणेंकार
गोंयकारांनी भोवजनाचें सरकार सत्तेर हाडलां. पेडणें म्हालांत सरकारी मुख्य पदांचेर चडशे भोवजन समाजांतले अधिकारी आसात. ते भायर मुख्यमंत्री डॉ. प्रमोद सावंत हे लेगीत भोवजन समाजांतलेच फुडारी आसात. ते भोवजन समाजाच्या हिता खातीर वावुरतात. तांणी ह्या प्रकरणांत लक्ष घालून आदीं जे पद्दतीन ओबीसी प्रमाणपत्रां दिताले तशींच आतांय दिवपाची वेवस्था करची. पेडणें म्हालांतले दोनूय आमदार जीत आरोलकार आनी प्रवीण आर्लेकार हांणी हातूंत लक्ष घालून जनहिता खातीर वावुरचें, असो उमेश तळवणेंकार हांणी उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
