भांगरभूंय | प्रतिनिधी
ऑस्ट्रेलियेचो मुखेली अरोन फिंचान मदले फळयेंतलो बॅट्समनाच्या रुपान फॉर्मांत पुनरागमन केलें, जाल्यार मॅथ्यू वेडान फिनीशराची आपली भुमिका योग्य रितीन वठयली, ताका लागून ऑस्ट्रेलियेन बाबत सुरवाती उपरांत जबरदस्त पुनरागमन करतना वॅस्ट इंडिजा आडची पयली टी-20 मॅच तीन विकेटींनी जिखली.
ऑस्ट्रेलियेन 146 धांवड्यांचो फाटलाव करतना एका वेळार 58 धांवड्यांचेर पांच विकेटी वगडायिल्ल्यो. ते उपरांत फिंच ( 53 बॉलांनी 58 धांवड्यो) आनी विकेटकीपर बॅट्समन मॅथ्यू वेड (29 बॉलांनी नाबाद 39) हांणी योग्य रितीन स्थिती हाताळ्ळी. दोगांयनी सवे विकेटी खातीर 69 धांवड्यांची भागिदारी केली. ताका लागून ऑस्ट्रेलियेक 19.5 ओव्हरींनी सात विकेटी वगडावन जैत जोडलें. ह्या जैतान दोन मॅचींचे माळेंत ताणें 1-0 अशी आघाडी घेतली.
ते पयलीं टॉस हारल्या उपरांत पयलीं बॅटींग करतना वॅस्ट इंडिजान 9 विकेटी वगडावन 145 धांवड्यो केल्यो. कायल मायर्सान सगल्यांत चड 39 धांवड्यो केल्यो. जाल्यार आठवे सुवातेर बॅटिंगेक येवपी ओडियन स्मिथान 27 धांवड्यांचें योगदान दिलें.
ऑस्ट्रेलिये वतीन जोश हेझलवुडान तीन जाल्यार पॅट कमिन्स आनी मिशेल स्टार्क हाणें दरेकी दोन विकेटी घेतल्यो.
भारताचे भोंवडेर उत्कृश्ट प्रदर्शन करपी कॅमरून ग्रीनाक ऑस्ट्रेलियेच्या पंगड वेवस्थापनान ओपनराच्या रुपान कायम दवरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
