ऑस्ट्रेलिया 62 धांवड्यांनी मुखार

भांगरभूंय | प्रतिनिधी

बॉर्डर-गावस्कर ट्रॉफीची दुसरी टॅस्ट उमळशीक वाडोवपी स्थितींत पावल्या. ऑस्ट्रेलियेन पयल्या डावाच्या आदाराचेर एक धांवडेची आघाडी घेतल्या उपरांत दुसऱ्या दिसाचो खेळ सोंप मेरेन दुसऱ्या डावांत एक विकेट वगडावन 61 धांवड्यो केल्यात.

ट्रेवीस हेड आनी मार्नस लाबशेन खेळपट्टीचेर आसात. ऑस्ट्रेलियेची वट्ट आघाडी 62 मेरेन पावल्या.

ते पयलीं भारताचो पयलो डाव 262चेर सोंपलो. एका वेळार भारतान 139 धांवड्यांचेर 7 विकेटी वगडायिल्ल्यो. ते उपरांत अक्षर पटेल (74) आनी आर आश्विन (37) हांणी आठवे विकेटी खातीर 114 धांवड्यांची भागिदारी करून भारताक मॅचींत हाडलो.

ते पयलीं ऑस्ट्रेलियेन टॉस जिखून पयलीं बॅटींग करतना पयल्या डावांत 263 धांवड्यो केल्ल्यो.

भारतान काल दुसऱ्या दिसा बिनबाद 27 धांवड्यां वयल्यान मुखार खेळपाक सुरवात केली. त्या वेळार मुखेली रोहित शर्मा 13 आनी लोकेश राहुल 4 धांवड्यांचेर नाबाद आशिल्लो. दोगांयनी पयले विकेटी खातीर 46 धांवड्यांची भागिदारी करीत ड्रिंक्स मेरेन ऑस्ट्रेलियेक एकूय विकेट दिली ना. पूण, उपरांत नॅथन लियॉनान आपलो खेळ सुरू केलो. ताणें राहुलाक (17) पयलीं बाद केलो.

जेवणाच्या विसवा मेरेन भारतान 88चेर चार विकेटी वगडायिल्ल्यो. ह्या वेळार विराट कोहलीन रवींद्र जडेजा वांगडा मेळून अर्द शेंकड्याची भागिदारी करून विकेटी पडपाच्यो थांबयल्यो. पूण, एका वादग्रस्त निर्णयाक लागून कोहलीची (44) खेळी सोंपली. कोहली बाद जाल्या उपरांत भारत परतून संकश्टांत सांपडलो. अशा वेळार अक्षर आनी आश्विन हांणी 114 धांवड्यांची भागिदारी करून ऑस्ट्रेलियेक व्हड आघाडी घेवपा पसून आडायलो.

ऑस्ट्रेलिये वतीन नॅथन लियॉनान 5 विकेटी घेतल्यो. टॉड मर्फी आनी मॅथ्यू कुह्यमॅन हांणी दरेकी दोन विकेटी घेतल्यो. एक विकेट पॅट कमिन्सान घेतली.

ऑस्ट्रेलियेची दुसऱ्या डावाची सुरवात बरी जाली ना. ओपनर उस्मान ख्वाजाक जडेजान 6 धांवड्यांचेर बाद केलो. ते उपरांत डॅव्हिड वॉर्नराचे गैरहाजेरेंत डावाची सुरवात करपाक आयिल्ल्या ट्रॅव्हिस हेडान नाबाद 39 धांवड्यो केल्यो. ताका मार्नस लाबशेनान ( खेळटा 16) बरी साथ दिली.