भांगरभूंय | प्रतिनिधी
येजमान ऑस्ट्रेलिया पंगडान दक्षीण आफ्रिके आड चालू आशिल्ले टॅस्टीच्या दुसऱ्या दिसा आपली पकड घट्ट केली. ऑस्ट्रेलियेन 4 विकेटी वगडावन 475 धांवड्यो केल्यात. उस्मान ख्वाजा 195 आनी मॅट रेन्शॉ पांच धांवड्यो करून खेळपट्टीचेर आसा. ते पयलीं स्टीव स्मिथान आपलो 30वो शेंकडो पुर्ण केलो.
ऑस्ट्रेलियेन तीन टॅस्टींचे माळेंत 2-0 अशी निर्णायक आघाडी घेतल्या. वर्ल्ड टॅस्ट चॅम्पियनशिपीचे दिश्टीन दक्षीण आफ्रिकेक ही टॅस्ट म्हत्वाची आसा. जाल्यार दुसरे वटेन मॅच बादाबाद उरली जाल्यारूय ऑस्ट्रेलियेक दुख्ख जावचें ना.
मजगतीं, ऑस्ट्रेलियेन काल 2 बाद 147 धांवड्यां वयल्यान मुखार खेळपाक सुरवात केली. स्मिथान आपलो शेंकडो पुर्ण केलो, जाल्यार ओपनर ख्वाजान आपलो 12वो शेंकडो पु्र्ण केलो. आतां तो दोट्टी शेंकड्याच्या लागसार पावला. 368 बॉलांक तोंड दितना ताणें 195 धांवड्यो केल्यात. हातूंत 19 चवके आनी एक सको मारला. टॅस्ट कारकिर्दींतलो ताचो हो सर्वोच्च स्कोर आसा. हाचे पयलीं 2015त न्युझिलॅण्डा आड 174 धांवड्यांची खेळी केल्ली.
मजगतीं, स्मिथान टॅस्ट कारकिर्दींतलो 30वो शेंकडो पुर्ण करून आदलो म्हान बॅट्समन डॉन ब्रॅडमनाक फाटीं घालो. ब्रॅडमनान ऑस्ट्रेलिये वतीन 52 टॅस्टींनी खेळटना 29 शेंकडे मारिल्ले. स्मिथान 92वे टॅस्टींत 192 बॉलांनी 104 धांवड्यो केल्यो. स्मिथान आतां मॅथ्यू हेडनाची बरोबरी केली. हेडनान 30 शेंकडे मारल्यात. स्मिथा मुखार आतां फकत रिकी पॉण्टींग आनी स्टीव वॉ आसा. वॉ हाणें 32 आनी पॉण्टिंगान 41 शेंकडे मारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
