भांगरभूंय | प्रतिनिधी
इंडियन सुपर लीग 2022-23 (आयएसएल)चे प्ले ऑफाची सर्त आतां निमाण्या टप्प्यांत आयल्या. पयल्या स पंगडांकूच प्ले ऑफांत सुवात मेळटली. एफसी गोवा पयल्या स पंगडांतली सुवात आनीक घटमूट करपा खातीर मैदानांत देंवतलो, जाल्यार प्रतिस्पर्धी इस्ट बंगाला खातीर आतां दरेक मॅच करात वा मरात अशी आसा.
फाटल्या सप्तकांत एफसी गोवान जैत जोडून ओडिशा एफसीक सवे सुवातेर घुकलिल्लो. आतां आयची मॅच जिखून ताका गुणांचें अंतर वाडोवाची संद आसा.
दुसरे वटेन इस्ट बंगाल 12 गुणां सयत णववे सुवातेर आसा. ताका लागून प्ले ऑफांत सुवात मेळोवपाक ताका सगल्योच मॅची जिखच्यो पडटल्यो. चार दिसां पयलीं एफसी गोवान केरळा ब्लास्टर्साक 3-1 अशा गोल फरकांनी हारयिल्लो. आतां तेंच सातत्य कायम राखून थेट गुणतकट्यांत तिसरे सुवातेर उडी घेवपाचो ताचो यत्न आसतलो. पूण, एफसी गोवा ज्या पंगडांक फाटीं घालतलो त्या पंगडां कडेन दोन अतिरिक्त मॅची आसात. एफसी गोवान घरच्या मैदानाचेर जबरदस्त प्रदर्शन केलां.
इकर गौरोत्स्केनान फाटले मॅचींत अंदूंच्या हंगांतल्या सातव्या गोलाची नोंद केली. जाल्यार नोआ सदौईन स गोल केल्यात. रिदीम तलांगान फाटले मॅचींत गोल करून आपल्या गोलांची वट्ट संख्या तिनाचेर व्हेली.
मुख्य प्रशिक्षक कार्लोस पेना आयचे मॅची खातीर कांय बदल करपाक शकता. मुखेल खेळगड्यांक विसव दिवन अखेरच्या मॅची खातीर तांकां ताजे दवरपाचो ताचो यत्न आसतलो.
फाटले मॅचींत जैत जोडून लेगीत चेपण कायं उणें जावंक ना. तें जैत म्हत्वाचें आशिल्लें. आनी पंगडान लेगीत जबरदस्त कामगिरी केली. पूण, तांणी अजून निमाणें ध्येय साध्या जावंक ना. आतां आमचें पुर्ण लक्ष्य आयचे मॅचीचेर आसा. ही मॅच लेगीत आमचे खातीर तितकीच म्हत्वाची आसा अशें पेनान म्हणलें.
इस्ट बंगालाक फाटले मॅचींत हैदराबाद एफसी आड हार घेवची पडली आनी ताका प्ले ऑफांत सुवात मेळोवपाच्या यत्नांक धपको बसलो. अंदूंच्या हंगांमांत घरच्या मैदानाचेर खेळटना ताका सवी हार घेवची पडली. स्टिफन कॉन्स्टन्टायनाच्या पंगडान प्रतिस्पर्धी पंगडाच्या मैदानाचेर तिनूय मॅची जिखल्यात आनी होच सकारात्कम विचार घेवन तो आयज एफसी गोवा आड खेळपाक मैदानांत देंवतलो.
इस्ट बंगालान आतां मेरेन 15 गोल केल्यात आनी तातूंतले णव गोल क्लेयटन सिल्वान केल्या. अंदूंच्या हंगामांत सगल्यांत चड गोल करपी मुंबय सिटीच्या जॉर्ज डियाझा कडेन बरोबरी केल्या.
सिल्वा, सुहैर व्हीपी आनी महेश सिंग हे डिफॅण्डर प्रतिस्पर्धी पंगडांक नाकापुरो करीत आसात. इस्ट बंगालाच्या ताफ्यांत इव्हान गोंझालेज आस्पाव केल्ल्यान पंगडाक घटसाण आयल्या. आयचे मॅची खातीर तो पुर्ण तंदुरुस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
