भांगरभूंय | प्रतिनिधी
कोलकाताच्या विवेकानंद युवा भारती क्रिडांगण स्टेडियमाचेर एफसी गोवान अखेरेक इंडियन सुपर लिगेंत (आयएसएल) जैत जोडलें. काल जाल्ले मॅचींत एफसी गोवान येजमान ईस्ट बंगाल एफसीक 2-1 अशा गोल फरकांनी हारयलो.
एफसी गोवा ह्या मैदानाचेर आयएसएलाचो स मॅची खेळ्ळा. तातूंतल्या चार मॅचींनी ताका बरोबरीचेर समाधान मानचें पडलां, जाल्यार दोन मॅचींनी हार घेवची पडल्ली. कालची मॅच लेगीत 1-1 अशी बरोबरींत सुटल्ली अशें दिशिल्लें. पूण, 90+4 मिनटाक एडू बेडियान गेल्ल्या गोलाच्या नेटार एफसी गोवान जैत जोडलें. दुसरे वटेन येजमान ईस्ट बंगालाक सेगीत दुसरी हारीक तोंड दिवचें पडलें. ते पयलीं एफसी गोवा वतीन ब्रॅण्डन फर्नांडीसान सातव्या मिनटाक जाल्यार ईस्ट बंगाला वतीन क्लेयटन सिल्वान 64व्या मिनटाक पॅनल्टीचेर गोल केलो.
मॅचीच्या 22व्या मिनटाक ईस्ट बंगालाचो स्टार खेळगडो एलेक्स लिमाक दुखापत जाली. एफसी गोवाचो गोलकीपर धीरज मोइरांगथेमा कडेन ताची टक्कर जाली. पूण, मुळावो उपचार घेवन लिमा परतून मैदानांत देंवलो. येजमान प्रतिस्पर्धी पंगडाचेर आपलो शेक दवरता अशें दिसतालें. पूण, सातव्या मिनटाक एफसी गोवान प्रती हल्लो केलो. एफसी गोवाच्या खेळगड्यांनी ईस्ट बंगालाच्या बचाव फळीक घुस्पागोंदळांत घालपी डाव खेळ्ळो.
अलव्हारो व्हॅझक्युझान बॉल एफसी गोवाच्या पॅनल्टी क्षेत्रांत व्हेलो आनी ते उपरांत ब्रॅण्डन फर्नांडीसान गोलकीपर कमलजीत सिंगाक चकयत बॉल गोलपोस्टांत घालो. 11व्या मिनटाक लिमाक बॉक्सा लागसार फ्री कीक मेळ्ळी. पूण, ताचो यत्न दिशाहीन थारलो. 15व्या मिनटाक ईस्ट बंगालाच्या बचाव फळीन परतून पॅनल्टी बॉक्सांत गोंदळ घालो. पूण, ब्रॅण्डनाक ह्या वेळार गोल करपाक येस मेळूंक ना.
मध्यांतरा मेरेन एफसी गोवा 1-0 असो मुखार आशिल्लो. दुसऱ्या अर्दांत ईस्ट बंगालान बरोबरी करपाचो खर यत्न केलो. ताचो फायदो 63व्या मिनटाक बॉल आडावपाच्या यत्नांत एफसी गोवाचो गोलकीपर धीरजान सुहैराक उडयलो. ताका लागून रॅफ्रीन पॅनल्टी दिली. क्लेयटन सिल्वान कसलीच चूक करिनासतना बॉल जाळांत घालून ईस्ट बंगालाक बरोबरी मेळोवन दिली.
मॅच 1-1 अशी बरोबरींत सुटल्ली अशें दिसपाक लागिल्लें. चार मिनटांच्या भरपाय वेळेच्या निमाण्या खिणाक ईस्ट बंगालाच्या प्रेक्षकांक निर्शेणी आयली. एडू बेडियान फ्री किकीचेर आयिल्ल्या बॉलाक गोलपोस्टाची दिका दाखयली आनी एफसी गोवान 2-1 फरकान जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
