भांगरभूंय | प्रतिनिधी
लंडन ब्रीज इज डावन, हे सांकेतीक भाशेंत प्रधानमंत्री लिझ ट्रूस हांकां निरोप मेळ्ळो आनी कांय वेळान राणी एलिझाबेथ (दुसरी) हिच्या मरणाची घोशणा जाली. 96 वर्सांची महाराणी 1952 वर्सा सत्तेर आयली. भारत स्वतंत्र जावन पांच वर्सां जाल्लीं. तरीय त्या काळार बऱ्याच देशांनी ब्रिटीशाची सत्ता आशिल्ली. ब्रिटीश साम्राज्याचेर सुर्य केन्नाच मावळना, अशें ‘युलेसीस’ हे फ्रेंच कादंबरींत एक वाक्य आसा. त्याच ब्रिटनाक साबार देशांतल्यान फाटी सरचें पडलें. महाराणी एलिझाबेथाच्या काळांत ब्रिटीश साम्राज्याचें रुपांतर राष्ट्रकुलांत जालें. राष्ट्रकुल खेळां सर्त जाता, तातूंत ब्रिटिशांची सत्ता आशिल्ले देश वांटेकार जातात. महाराणयेन 70 वर्सां ब्रिटन, स्वायत्त ब्रिटीश वसणुकांचें राष्ट्रमुखेल पद सांबाळ्ळें. पुराय संवसारांत चड काळ राणीपदाचेर रावपाचो भोवमान तांकां मेळ्ळो. थायलॅण्डाचो राजा भुमीबोल अद्युलदेज दुसऱ्या क्रमांकाचेर आशिल्लो.
एलिझाबेथ अलेक्झांड्रा मेरी व्हिंडसर हें राणयेचें मूळ नांव. जल्म 21 एप्रील 1926. खंय तरी पयस खेड्यांत वचून शेतकारा सारकें जगचें, अशी तिची तरणे पिरायेचेर इत्सा आशिल्ली. मात, सत्तेची सुत्रां हातांत येवपा सारकी परिस्थिती राणी 10 वर्सांची आसतना घडली. तिच्या चुलत्यान 1936 त अमेरिकेंतले एके घटस्फोटीत बायले वांगडा लग्न करपाचें थारायलें. हें रिती- परंपरेक भायर म्हूण इंग्लंडाचे चर्चीन विरोध केलो. देखून तांणी राजाचें पद सोडलें आनी लग्न केलें. तांचो धाकटो भाव अल्बर्ट राजा जालो…. आनी तांच्या मरणा उपरांत चली एलिझाबेथ महाराणी. आदल्या तेंपार शिंवासन मेळटालें वा झगडून मेळयताले. कोणूय राजा जातालो आनी मनाक येता तसो कारभार करतालो. ताका सल्लो दिवपाक प्रधानांचें मंडळ आसतालें. मात, राणयेन ब्रिटनाचो बारीकसाणेन अभ्यास केलो. प्रत्यक्ष आनी पुस्तकां वाचूनय. पद मेळ्ळें म्हूण तिचे तकलेंत मद घुसलो ना. दुसऱ्यांचें म्हणणें तिणें समजून घेतलें. ती सत्तेर आयली तेन्ना ब्रिटनाचें साम्राज्य आशिल्ले आशीकुशीचेर देश स्वातंत्र्या खातीर झगडटाले. तांच्यो इत्सा, हांवेस महाराणयेन समजून घेतले. ते पूर्ण केले. ‘म्हजे जिणेंत हांव तुमचो विस्वास जिखपाचो मना सावन यत्न करतलीं’, अशें तिणें राज्याभिशेका वेळार म्हणिल्लें. तिच्या मरणा उपरांत ब्रिटिशांचे राजवटी खाला हाल- हाल जाल्ल्या, राजेशायेच्या विरोधांत आशिल्ल्या देशांनीय तिका आर्गां ओंपल्यांत. म्हणजे तिणें मनां जिखल्या आसतलीं.
महाराणी भारतांत तीन खेपे आयल्या. पयले खेप 1961 त. त्या वेळार तिणें राजघाटार वचून महात्मा गांधीजींक आर्गां ओंपिल्लीं.
आमच्या देशाक 50 वर्सां जालीं, तेन्ना 1997 त ती भारतांत आयिल्ली. जालियनवाला बाग ही दुखेस्त घडणूक अशें सांगून मान बागोवन हुतात्म्यांक आदरांजली दिल्ली. महाराणयेन भौशीक जिवितांत प्रतिश्ठा आनी सभ्यताय राखली, अशी प्रतिक्रिया प्रधानमंत्री नरेंद्र मोदी हांणी उक्तायल्या. खाजगी जिणेंत तिचेर साबार वायट, मनस्ताप दिवपी जायते प्रसंग कोसळ्ळे. मात, ती खंबीर रावली. भौशीक मळा वयलो वावर, खाजगी- राजकी जीण, राजेशाय ही तारे वयली कसरत निमणे मेरेन बरे तरेन सांबाळ्ळी. संद आसूनय तिणें राणी पदाक खत लागत अशीं वक्तव्यां, वर्तन केलें ना. दुसऱ्या संवसारीक झुजांत राणयेन नं. 230873 ह्या नांवान काम केलां. आवय- बापूय, घरचीं कशींच परवानगी दिनाशिल्लीं. मात फाटल्यान लागून तिणें तांचें मन वळयलेंच. ते खातीर ती ड्रायव्हींग आनी मॅकानिकाचें काम शिकली. कांय म्हयन्यां भितर तिका मानद कनिश्ठ कमांडर म्हूण बडटीय मेळ्ळी. 1992 सावन ती देशाचे सगले कर भरताली. 1992 वर्सा तिच्या व्हिंडसर राजवाड्याक उजो लागलो. तेन्ना प्रजेन पयशे दिवपाक न्हयकार दिलो. आंदोलनां जालीं. त्या वेळार राणयेन 70 टक्के खर्च स्वताच्या पयशांतल्यान केलो. बकिंगहॅम पॅलेस तिकेट लावन लोकां खातीर उक्तो करपाचो इतिहासीक निर्णयूय घेतलो आनी उरिल्लो खर्च भरून काडलो. तिकां फॅशन, वाचन, कलेची आवड आशिल्ली. ती बेसबरी मिमिक्रीय करताली, अशें इंग्लंडाच्या दोन बिशपांनी बरोवन दवरलां.
भारताचेर देडशें वर्सां राज्य केल्ल्या ब्रिटिशांच्या अत्याचाराक लागून, कोहिनूर हिरो, भारतीय वस्तू, म्हत्वाचे दस्तावेज वतना व्हेल्ले म्हणून कांय भारतीयांच्या मनांत ब्रिटीशां विशीं कोडसाण आसा. महाराणी एलिझाबेथ त्या राष्ट्राचीच नागरीक. पूण मरणा उपरांत वैर सोंपता खंय. महाराणी एलिझाबेथ
हिका आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
