भांगरभूंय | प्रतिनिधी
बालभवनाचे संचालक दयानंद चावडीकार हांचो आयज 6 जुलयाक वाडदीस. ते निमतान विशेश.
———–
दयानंद चावडीकार हे शेतकार कुटुंबांत जल्मले, संकश्टांचेर मात करीत तांणी उसगांवच्या ताराबाई दळवी हायस्कुलांतल्यान शालेय शिक्षण पुराय केलें. सिद्धार्थ बांदोडकार हायर सेकंडरींतल्यान बारावी, मागीर दामोदर कॉलेजींतल्यान बी. कॉम. पदवी मेळयली. एम. कॉम. उपरांत गोंय विद्यापिठांत एम.फिल पुराय केली. मागीर कायद्याची पदवी.
चावडीकर सरान, 6 जुलय 1990 सावन शिकोवपाचें काम करतना गरजेवंत विद्यार्थ्यांचो शिक्षणाचो भार उखलून तांकां सदांच प्रोत्साहन दिलें. समाजसेवा हो सरांचो गूण. लातूराचो भुंयकांप आसा वा कारगिलाची आपत्कालीन परिस्थिती, सरांचो सगळ्यांत म्हत्वाचो गूण म्हणल्यार आपल्या पगारांतलो एक भाग दिवन तांणी मजतीचो हात फुडें केलो. तांणी शिक्षण कायदो, आरटीआय अशा म्हत्वाच्या विशयांचेर कार्यशाळा घडोवन हाडल्यो. शिक्षक आसूं वा कर्मचारी, सुटयेच्या दिसांनी लेगीत ते फुडाकार घेतात आनी प्रशिक्षण कार्यावळी घडोवन हाडटात.
सरकारी सुविधां पासून वंचित आशिल्ल्या, पेन्शन थकिल्ल्या लोकांक ते सदांच आदार करता. 5 ते 10 वी मेरेनच्या मराठी शाळांक तांणी नवी जीण दिल्ली. सध्या ह्यो सगळ्यो शाळा बऱ्यो चलतात. सराचे पात्रतायेक लागून शिक्षण खात्यान 2010 वर्सा कायदेशीर सल्लागार म्हणून तांकां नेमले. ते एक तज्ञ वकील आशिल्ल्यान शिक्षण खात्याच्यो केशी स्वता पळयतात. शाळा वेवस्थापन आनी शिक्षण ह्या मळार वकील म्हणून ताची नामना आसा.
शिक्षण सचीव रवी धवन आनी दयानंद चावडीकार हांणी बालभवनाचें काम हातांत घेतले उपरांत बालभवनाच्या भुरग्यां खातीर वेगवेगळ्यो कार्यावळी चालू आसात. श्री. चावडीकार हे बालभवनाचे संचालक. तांणी हें पद सक्रीयपणान आनी पुराय उमेदीन हातांत घेवन बालभवनाक फावो तो न्याय दिला. बाल भवन ही एकूच संस्था, जी भुरग्यांनी सृजनशीलतायेक चालना दिता. चावडीकार हांच्या फुडारपणा खाला वेगवेगळ्यो कार्यशाळा, प्रशिक्षण कार्यावळी, प्रकाशनां, भुरग्यां खातीर सर्तीं, भुरग्यांच्या व्यक्तिमत्व विकासा खातीर चित्रकला, हस्तकला, शिल्पकला, संगीत, नाच, कथा सांगप, संगणक, नाटक, खेळ, योग अशा माध्यमांतल्यान बालभवन गोंयभर सक्रीय आसा.
लॉकडावनांत लेगीत ऑनलायन वर्ग
लॉकडावनाच्या काळांत बालभवनाच्या कार्यावळींनी खंड पडचो न्हय म्हणून प्रशिक्षकां वरवीं वेगवेगळ्या विशयांचेर व्हिडियो लेसन तयार केल्ले. गोंय विद्यापीठाच्या सहकार्यान हस्तकला आनी चित्रकला विशयांचेर व्हिडियो तयार करून युट्युब चॅनलाचेर प्रसारीत केले. भुरग्यां खातीर हे शिक्षणीक व्हिडियो बालभवनाच्या युट्युब चॅनलाचेर आयज लेगीत आसात. कोवीड महामारी सुरू जाले उपरांत सगळ्या सरकारी नेमांक पाळो दिवन भुरग्यां खातीर नेमान वर्ग सुरू केले. बालभवनाच्या कार्यावळींचो लाव गोंयच्या भुरग्यांक जालो.
एप्रिल- मे सुटयेच्या दिसांनी भुरग्यांक वेगवेगळे कलेचो आस्वाद घेवपा खातीर पणजी बलभवान उन्हाळी शिबिर घडोवन हाडलें. गोंयभरांतल्या 52 केंद्रांतल्यान सुमार 6 हजार भुरग्यांनी तातूंत वांटो घेतिल्लो. ह्या शिबिरांचो एक भाग म्हूण बालभवन केंद्रांतल्यान 30 एप्रील ते 24 मे मेरेन “गुणदर्शन-2022” च्यो 42 कार्यावळी आयोजीत केल्यो. ह्या कार्यावळींक व्हड प्रमाणांत भुरग्यांनी आनी पालकांनी प्रतिसाद दिलो.
बालश्री पुरस्कार वांटप
गुरुदत्त विष्णुपंत कुलकर्णी आनी वैष्णवी जोशी हांकां गोंयचे मुख्यमंत्री प्रमोद सावंत हांणी बालश्री पुरस्कार दिवन भोवमान केलो. गोमंत बालभूषण पुरस्कार सात जाणांक दिले.
प्रशिक्षकां खातीर कार्यशाळा
भुरग्यांचें मानसशास्त्र आनी आधुनिक शिक्षण पद्दतीचीं म्हत्वाचीं सूत्रां हाचेर एक दिसाची कार्यशाळा घेतली. तातूंत
दोनशें परस चड प्रशिक्षकांनी वांटो घेतलो. बाल हक्क आयोगाची वांगडी रेखा डिसिल्वा हांच्या मार्गदर्शना खाला ही कार्यशाळा घडोवन हाडली. भुरग्यांक नव्या शिक्षणीक तंत्रगिन्यानाची वळख करून दिवपा खातीर बालभवनांत कोडिंग प्रोग्राम, आर्टिफिशियल इंटेलिजन्स, व्हर्च्युअल रियलिटी आदी सुरू करतले अशी म्हायती श्री. चावडीकार हांणी दिल्या. 3 ते 21 पिराय गटां खातीर हे वर्ग आसतले. बालभवन संचालकान खर्चांत कपात करून बालभवना खातीर निधी तयार करपाचे भर दिला.
संगीत परिक्षा केंद्र
अखिल भारतीय गांधर्व महाविद्यालयाक संबंदीत आशिल्ल्या बालभवनाच्या संगीत परिक्षा केंद्राचो गोंयांत भुरग्यांक लाव मेळटा. संचालक श्री चावडीकार हांणी संगीत तज्ञांची परिक्षा दिवपाची तजवीज बालभवन कंपाल पणजे जावपाची वेवस्था केल्या.
कर्मचाऱ्यांचे प्रलंबीत प्रस्न सुटावे
बालभवनाच्या कर्मचाऱ्यांच्यो बसका घेवन सगल्या प्रशिक्षक आनी कर्मचाऱ्यांच्यो समस्या सोडोवपा खातीर श्री चावडीकार हांणी खास यत्न केले. आमी सगळे एकठांय आनी बालभवन कुटुंबाचे वांगडी आसात असो संदेश बाल भवन आनी बाल भवन प्रशिक्षकांक श्री चावडीकार हांणी दिला. सर, अडचणीच्या वेळार कोणाकूय स्वता विशीं कसलोच अहंकार बाळगीनासतना मजत करपी एक उदार व्यक्तिमत्व. तांचो अणभव आनी सकारात्मक विचार आमकां नक्कीच प्रेरणा दितलो. 6 जुलयाक ते 57 व्या वर्सांत पदार्पण करतात. तांकां बरी भलायकी, दीर्घायुष्य मेळचें म्हूण प्रार्थना.
– महेश गांवस
प्रशिक्षक, बालभवन
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
