उद्देगीक प्रदुशणाचेर विरोधकांं कडल्यान सरकाराची कोंयडी

भांगरभूंय | प्रतिनिधी

कुंकळ्ळी उद्देगीक वसणुकेंत प्रदुशण

पणजी : उद्देगीक वसणुकेंत जावपी प्रदुशण आनी बंद उद्देगांचेर विधानसभेंत शुक्रारा नेटाची चर्चा जाली. कुंकळ्ळी उद्देगीक वसणुकेंत जावपी प्रदुशण तशेंच खोर्ले उद्देगीक वसणुकेंतल्या बंद उद्देगांचेर सरकाराची आमदारांनी कोंयडी केली. उद्देगांची पळोवणी जावपा सयत प्रदुशणाचेर कारवाय करपाचें आस्वासन मुख्यमंत्र्यांनी आमदारांक दिलें.

प्रस्नोत्तरा उपरांंत लक्षवेधी सुचोवणेचेर उद्देगीक वसणुकांच्या प्रस्नाचेर चर्चा जाली.

प्रदुशण नियंंत्रण मंंडळ, फॅक्टरी आनी बॉयलर हांचे कडल्यान उद्देगांची तपासणी जाता. थोड्याच तेपान आमी सगल्या उद्देगीक वसणुकांंची पळोवणी करतले. ज्या उद्देगां कडेन इटीपी ना तांंकां ईटीपी घालपाक सांगतले. प्रदुशणाचेर नियंत्रण दवरपा खातीर उपाय येवजण्यो करपाचे आदेश जारी जातले. कुंकळ्ळी उद्देगीक वसणुकेंत प्रदुशणकारी उद्देगांचें प्रमाण चड आसा. उद्देगीक वसणुकेंत बेकायदाे गजाली जातात, अशी गजाल विरोधी पक्ष फुडारी युरी आलेमांव हांणी लक्षवेधी सुचोवणे वरवीं सभाघरांत मांंडली. हाचेर उलयतना मुख्यमंत्री डॉ. प्रमोद सावंत हांणी वयलें आस्वासन दिलें.

कुंकळ्ळी उद्देगीक वसणुकेंतलीं उद्देगीक आस्थापनां नेमांक पाळो दिनात. घाणयारे उदक शेती तशेंच पियेवपाच्या उदकांत वता. प्रदुशण करपी उद्देगांचेर कारवाय करपाची मागणी युरी आलेमांव हांंणी केली. कुंकळ्ळी उद्देगीक वसणुकेंतल्या उद्देगांंक लागून केपें मतदारसंघात प्रदुशण जाता. शेतां पेड्डेर जातात अशें आमदार एल्टन डिकॉस्टान सांंगलें.

प्रस्नोत्तराक लेगीत उद्देगीक वसणुकांचे स्थितीचेर चर्चा जाली. उद्देगीक वसणुकेंत साधनसुविधा उबारपा सयत हेर सुविधा उपलब्ध करपाची प्रक्रिया सुरू आसा. दरेका उद्देगीक वसणुकेंत जी उक्ती सुवात आसा, तातूंतलीं 7.5 टक्के सुवात उद्देगांक मेळटली. उद्देगीक वसणुकेंतल्या उद्देगांत थळाव्या लोकांंक रोजगारांत प्राधान्य दिवपाचें धोरण आसा, अशें उद्देग मंत्री मॉवीन गुदिन्हो हांणी सांंगलें.

एल्टोन डिकॉस्टा हांच्या प्रस्नाचे फाटभुंयेर आयडीसी तशेंच उद्देगीक वसणुकांच्या समस्यांचेर चर्चा जाली. किटला उद्देगीक वसणुकेंत थीम पार्क, मनरिजवण पार्क अशे प्रदुशणमुक्त उद्देग स्थापन जातले. किटलांत 8.83 लाख चौखण मिटर जमीन उद्देगीक वसणुके खातीर संपादीत केल्या, अशें उद्देग मंत्री मॉवीन गुदिन्हो हांणी सांगलें.

उद्देगीक वसणुकांनी उजो पालाेवपी यंत्रणा, प्रशासकी इमारत, पुलीस गस्त, वाठाराची नितळसाण ह्यो गजाली मे म्हयन्या मेरेन जातल्यो. उद्देगीक वसणुकेंतले कर्मचारी, उद्देजक हांंकां सुविधा उपलब्ध करतले. झाडांं झोपां मारून उद्देगीक वसणुकांंची नितळसाण जातली. थळाव्या आमदारांक घेवन हांंव उद्देगीक वसणुकेंत भेट दितलों. उद्देगीक वसणुकेंतल्या स्थितीची पळोवणी करून ते प्रमाण कार्यवाही जातली.

उद्देगांं खातीर गुंंतवणूक उर्बा म्हामंडळाचे मान्यताये उपरांत सरकारान 7 लाख चौखण मिटर जाग्याचें रुपांंतरण केलांं. थळाव्यांं लोकांंक रोजगार मेळपा खातीर जमनीचें रुपांंतरण केलांं असो आरोप आमदार विजय सरदेसाय हांंणी केलो. ह्या उद्देगांनी आतां मेरेन कितल्या थळाव्या लोकांंक रोजगार उपलब्ध जाला ताची म्हायती सरकारान दिवची अशी मागणी तांंणी केली.

खोर्ली उद्देगीक वसणुकेंतले चडशे उद्देग बंद

खोर्ली उद्देगीक वसणुकेची स्थिती सामकी बाबत आसा. चडशे उद्देग बंद आसात. खोर्ली उद्देगीक वसणुकेंत बंंद उद्देग सुरू जावचें म्हूण सरकार किदें करता? असो प्रस्न कुमारजुंवेंचे आमदार राजेश फळदेसाय हांणी केलो. खोर्ली उद्देगीक वसणुकेंत 107 उद्देग आसात. हातूंतले 86 उद्देग सुरू आसात आनी 21 उद्देग बंद आसात. ही म्हायती बरोबर ना, 70 उद्देग बंद आसात असो आरोप राजेश फळदेसाय हांणी केलो. बंद उद्देग सुरू करपाचे यत्न आसात. हस्तकला म्हामंडळा कडेन 40 हजार चौखण मिटर सुवात आसा. ही सुवात ताब्यांत घेतली जाल्यार नव्या उद्देगां खातीर जागो उपलब्ध जातलो अशें उद्देग मंत्री मॉवीन गुदिन्हो हांणी सांगलें.