भांगरभूंय | प्रतिनिधी
31 जाणांचे जीव वाटावपाक येस; 558 कॉल्सांक प्रतिसाद
पणजी: 18 फेब्रुवारी ते 4 मार्च ह्या 15 दिसांच्या काळांत उजो पालोवपी दळान 588 कॉल्सांक प्रतिसाद दिवन सुमार 1.29 कोटी रुपयांची मालमत्ता आनी 31 जाणांचे जीव वाटयल्यात. ह्या काळांत दळान उज्या संदर्भांतले 467, जाल्यार आपत्कालीन 90 कॉल्सांक प्रतिसाद दिला.
फाटल्या कांय दिसां सावन गोंयांत उज्याच्यो घडणुको व्हड प्रमाणांत घडत आसात. अशा घडणुकांची तत्काळ दखल घेवन उज्याचेर नियंत्रण मेळोवप तशेंच नागरिकांचे जीव, मालमत्ता वाटावपाचे यत्न दळाच्या जवानां कडल्यान जायत आसतात.
खात्यान जारी केल्ल्या 18 फेब्रुवारी ते 4 मार्च ह्या काळांतले आंकवाडी प्रमाण उज्याच्या 467 कॉल्सांक दळान प्रतिसाद दिला. तातूंत सुमार 1.21 कोटींची मालमत्ता आनी दोगांचे जीव वाटायल्यात. ह्या घडणुकांनी सुमार 56.52 लाखांच्या मालमत्तेचें लुकसाण जालें. खात्यान हेर आपत्कालीन 90 कॉल्सांक प्रतिसाद दिला. तातूंत पांच नागरीक आनी 24 प्राणी अशे मेळून 29 जाणांचे जीव आनी 7.40 लाखांची मालमत्ता वाटायली. ह्या घडणुकांनी सुमार 8 लाखांचें लुकसाण जालां, जाल्यार स नागरीक आनी दोन प्राणी अशा आठ जाणांक जीव व्हगडावचो पडला.
ह्या 15 दिसांच्या काळांत घडिल्ल्या उज्याच्या घडणुकां मदीं सगल्यांत चड 15 लाखांचें लुकसाण कुडचडें वाठारांत जालां. उपरांत मडगांव वाठारांत 13 लाख आनी पोरणें गोंय वाठारांत 2.50 लाखांचें लुकसाण जालां.
24 वरांत 85 कॉल्सांक प्रतिसाद
शुक्रार आनी शेनवारच्या 24 वरां मदीं उजो पालावपी दळान उज्या संदर्भांतले 81 आनी आपत्कालीन 4 अशा वट्ट 85 कॉल्सांक प्रतिसाद दिला. आपत्कालीन घडणुकांनी एकल्याचो जीव वाटावपाक दळाक येस आयलां. पूण दोगांनी जीव व्हगडायला. ह्या 24 वरांत 25.90 लाखांची मालमत्ता वाटायली. जाल्यार 34.58 लाखांच्या मालमत्तेचें लुकसाण जालें. 81 मदल्या तीन सुवातींच्या उज्याच्यो घडणुको गंभीर स्वरुपाच्यो आशिल्ल्यो अशें खात्यान नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
