भांगरभूंय | प्रतिनिधी
भांगरभूंय प्रतिनिधी
मडगांवः राज्यांतल्या भाजप सरकारान आपल्या राजकीय फायद्या खातीर म्हादय कर्नाटकाक तशेंच पश्चीम घाट आनी गोंयची दर्यादेग भांडवलदारांक विकल्या. आतां मुख्यमंत्री डॉ. प्रमोद सावंत हांणी सरकार ईशा फाऊंडेशना वांगडा कृशी वेवसाया आनी दर्यादेगे खातीर कबलात करतले अशें जाहीर केलां. मुख्यमंत्र्यांनी तिचेर सय करचे पयलीं कबलातीचो मसुदो भोवशीक करची, अशी मागणी काँग्रेस पक्षाचो कार्याध्यक्ष आनी कुंकळ्ळीचो आमदार युरी आलेमाव हांणी केल्या.
आपल्या दरेका निर्णयान गोंयच्या हिता कडेन तडजोड करपी भाजप सरकारा वयलो गोंयकारांचो विश्वास ना जाला. मुख्यमंत्र्यांनी सांगिल्ल्या प्रमाण कृशी मळार तशेंच दर्यादेगे संबंदी ईशा फावंडेशनाची भूमिका कसली आसतली हें जाणून घेवपाचो गोंयच्या लोकांक अधिकार आसा. तांचे कडेन करतात ते कबलातींत पारदर्शकता आसपाक जाय अशें युरी आलेमांव हाणी म्हणलां.
लोकशाय शासन यंत्रणेत मंत्रिमंडळाच्या बसकांनी विचारविनिमय करून आनी विरोधी पक्षांक विश्वासात घेवन राज्याच्या हिताचे धोरणात्मक निर्णय घेवप गरजेचें आसता. पत्रकार परिशदेंत ह्या म्हत्वाच्या निर्णयांची घोशणा करप सारकें न्हय, अशें तांणी सांगलां.
गोंयांतलें भाजप सरकार गोंयात एकाद्या संस्थेचे केंद्र स्थापन करपा खातीर लागवडी खाला आशिल्ली जमीन तशेंच दर्या देगो दान करपाक फाटींफुडें पळोवचें ना. सरकारचे दरेका हालचालीचेर लोकांनी नदर दवोरपाक आसा अशें सागून मुख्यमंत्री आपणे केल्ले मागणेची दखल घेतले अशी आस्त तांणी उक्तायल्या. लोकहिताचे प्रश्न मांडपा ही म्हजी लागणूक आसा. गोंय आनी गोंयच्या हित राखणे खातीर आपूण सदांच वावुरतलों अशें आलेमाव हाणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
