ईटीपी ना जाल्यार नुस्त्यांचें प्रकल्प बंद
भांगरभूंय | प्रतिनिधी
कुंकळ्ळी उद्देगीक वसणुकेंत प्रदुशणाच्या प्रमाणांत वाड
- आयडीसी कायद्यांत जातली दुरुस्ती
भांगरभूंय प्रतिनिधी
पणजी : कुंकळ्ळी उद्देगीक वसणुकेंतल्या नुस्तें प्रक्रिया प्रकल्पांत घाणयारे उदक सोडपी
यंत्रणा (ईटीपी) कार्यान्वीत करची पडटली. ईटीपी यंत्रणा नासत जाल्यार प्रदुशण करपी नुस्त्यांचें
प्रकल्प बंद जातलें, अशें मुख्यमंत्री डॉ. प्रमोद सावंत हांणी सांगलें.
कुंकळ्ळी उद्देगीक वसणुकेंत जावपी प्रदुशणाच्या प्रस्नाचेर सभाघरांत बरोच वेळ चर्चा जाली. विरोधी पक्ष फुडारी युरी आलेमांव हांचो हो प्रस्न आशिल्लो. प्रदुशण नियंत्रण मंडळाचो पंगड वचून घाणयारे उदक सोडपी यंत्रणेची (ईटीपी) पळोवणी करतले. कांय नुस्तें प्रकल्पांनी ईटीपी बंद दवरल्या. हाका लागून घाण वास येता. प्रदुशण नियंत्रण मंडळाच्या पंगडान पळोवणी केले उपरांत कारवाय जातली, अशें मुख्यमंत्री डॉ. प्रमोद सावंत हांणी सांगलें.
नुस्तें प्रक्रिया उद्देगांक 2011 वर्सा परवाने दिल्ले. 2012 वर्सा हे सुरू जाले, अशेंय मुख्यमंत्र्यान सांगलें. कुंकळ्ळी उद्देगीक वसणुकेंतल्या प्रकल्पांची तपासणी जावपाची गरज आसा.
आयडीसी कायद्यांत जातली दुरुस्ती कुंकळ्ळी उद्देगीक वसणुकेंत कांय उद्देग मान्यताये परस चड विजेचो वापर करतात. जीएसटी येणावळ लेगीत बुडयतात. सरकाराची कोट्यांनी रुपयांची येणावळ
बुडटा, असो आरोप युरी आलेमांव हांणी केला.
आयडीसींतल्या उद्देगांनी जे गैरवेव्हार जातात, तांचेर कारवाय करपा खातीर आयडीसी कायद्यांत
दुरुस्ती करपाचो प्रस्ताव आसा. आयडीसी वेवस्थापकांक चड अधिकार दिवपाची तजवीज जातली.
हाका लागून तांकां कारवाय करप शक्य जातले, अशें मंत्री मॉवीन गुदिन्हो हांणी सांंगलें.
स्टील उद्देगांनी जितले उत्पादन जाता, ते प्रमाण ताची नोंद जायना. विजेचो चड वापर करपी 15 उद्देग
कुंकळ्ळी उद्देगीक वसणुकेंत आसात, असो आरोप युरी आलेमांव हांणी केलो. सगल्या खात्यांची जोड
बसका घेवन उपाय काडटले, अशें मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
