भांगरभूंय | प्रतिनिधी
ओपनर बॅट्समन जेसन रॉय (73) आनी फिलीप सॉल्ट (77) हांच्या अर्द शेंकड्यां नेटार इंग्लंडान नॅदरलॅण्डाक दुसरे वन डे मॅचींत 6 विकेटींनी हारयलो. ह्या जैता सयत इंग्लंडान माळ लेगीत बोल्सांत उडयली.
नॅदरलॅण्डाच्या एम्सटलवीनाच्या व्हीआरए क्रिकेट मैदानाचेर जाल्ली मॅच पावसाक लागून 41 ओव्हरींची करची पडली. नॅदरलॅण्डान टॉस जिखून पयलीं बॅटींग करपाचो निर्णय घेतलो. मुखेली स्कॉट एडवर्डान 73 बॉलांनी 78 धांवड्यो केल्यो. ए़डवर्डान चार चवके आनी तीन सके मारले. ताचे खेरीत लोगन वॅन बीक (30) आनी शेन स्नेटर (17) हांणी अखेरच्या ओव्हरींनी 27 बॉलांनी 44 धांवड्यांची भागिदारी करून पंगडाचो स्कोर 235 धांवड्यां मेरेन पावयलो.
236 धांवड्यांचो फाटलाव करपी इंग्लंडाक रॉय आनी सॉल्ट हांणी बरी सुरवात करून दिली. दोगांयनी पयले विकेटी खातीर 17 ओव्हरींनी 139 धांवड्यांची भागिदारी करून दिली.
मुखेली इयोन मॉर्गन परतून एकदा शुन्याचेर बाद जालो. लियाम लिव्हिंगस्टन चार धांवड्यो करून तंबूंत परतलो. पूण, डॅव्हीड मलान (36) आनी मोईन अली (42) हांणी 37वे ओव्हरींत पंगडाक मोख मेळोवन दिली. ह्या जैता सयत इंग्लंडान तीन मॅचींचे माळेंत 2-0 अशी निर्णायक आघाडी घेतली. तिसरी आनी निमाणी मॅच 22 जूनाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
