भांगरभूंय | प्रतिनिधी
दुबावीत डेस्मंड आल्वारीसाक अटक; असीम मर्चंट जखमी
म्हापशें: दशशीर आसगांवां रस्त्याचे कुशीचीं फुलां काडून देवाक घाल्ल्याच्या कारणा खाला असीम मर्चंट (40, मुंबय) हांचेर कोयत्यान जिवघेणो हल्लो करपाचो प्रकार घडलो. ह्या प्रकरणांत हणजूण पुलिसांनी डेस्मंड आल्वारीस (62, दशशीर, आसगांव) ह्या दुबाविताक अटक केल्या.
पुलिसांनी दिल्ले म्हायती प्रमाण हो प्रकार सोमारा 3.30 वरांच्या सुमाराक घडलो. कागाळदार जखमी असीम मर्चंट हे आयतारा आसगांवां आपल्या भावा कडेन आयिल्ले.
सोमारा दनपारां ते मोटारीन दशशीर हांगा महादेवाच्या देवळा कुशीक आयले. तांणी रस्त्याचे कुशीची रानवटी फुलां काडली आनी ती देवाक अर्पण केली. हाचे वयल्यान दुबावीत घरा भायर आयलो आनी जखमी मर्चंटाक गंळी संवून जाप विचारली. ह्या प्रकाराचो कागाळदार आपल्या मोबायला वयल्यान चित्रीकरण करतालो. त्याच वेळार दुबावितान घरांत वचून कोयतो हाडलो आनी कागाळदाराचे तकलेर ताणें हल्लो केलो. कागाळदारान हात आडवो घालून कोयत्याचो वार आडायलो. ताका लागून ताचे तकले सयत हाताक गंभीर जखम जाली.
घडणुकेची म्हायती हणजूण पुलिसांक मेळटकूच तांणी घडणुकेच्या थळार धांव घेतली. कागाळदार मर्चंट हांचे कागाळीच्या आदारान दुबाविता आड भादंसंच्या 307 कलमा खाला अटक केली. फुडलो तपास पुलीस उपनिरिक्षक तेजेशकुमार नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
