भांगरभूंय | प्रतिनिधी
खबरां संस्था
नवी दिल्लीः भारताची वेस्ट इंडिजाची भोंवडी जाल्या उपरांत आशिया करंड क्रिकेट सर्त जावपाची आसा. ही सर्त श्रीलंकेंत खेळोवपाचो निर्णय घेतिल्लो, मात श्रीलंकेंतली सध्याची राजकी, अर्थीक आनी समाजीक स्थिती पळयल्यार थंय ही सर्त घेवप शक्य जावचें ना अशे संकेत लंका क्रिकेट मंडळाच्या सचिवान दिल्यात. ताका लागून ही सर्त चड करून संयुक्त अरब अमिरातींत (यूएई) जावपाक शकता.
लंका क्रिकेटचो सचीव मोहन डिसिल्वान ही सर्त सध्याचे परिस्थितींत श्रीलंकेत घेवपा सारकी स्थिती ना अशें सांगलां. आशियाई क्रिकेट परिशद (एसीसी) सर्तीच्या सुवातेच्या बदलाची रोखडीच घोशणा करतली अशी अपेक्षा आसा. बीसीसीआयचो सचीव जय शङा हो एसीसीचो मुखेली आसा. स पंगडांचे हे सर्तीचे तारखेत बदल जावपाची शक्यताय ना. थारयल्ले प्रमाण ही सर्त 26 ऑगस्ट तें 11 सप्टेंबर मजगतीं जातली. मुखेल सर्ती पयलीं एक पात्रताय फेरी जातली. तातूंत हाँगकाँग, सिंगापूर, कुवेत आनी युएईचे पंगड एकमेकांक आव्हान दितले. अफगाणिस्तान, पाकिस्तान, भारत, श्रीलंका आनी बांगलादेश हें पाच पंगड थेट प्रवेशा खातीर पात्र आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
