आयपीएलच्या लीग फेरयेचो समारोप पंजाबाच्या जैतान

भांगरभूंय | प्रतिनिधी

खबरां संस्था
मुंबयः  लियाम लिव्हिंगस्टोनान 5 सके आनी 2 चौक्यांनी फकत 22 बॉलांत केल्ल्या नाबाद 49 धांवड्याक लागून पंजाब किंग्जान सनरायझर्स हैदराबादाक 5 विकेटीनी हारोवन आयपीएलांतले लीग फेरयेचो समारोप आपल्या जैतान केलो. हैदराबादान जैता खातीर दिल्लें 158 धांवड्याचें लक्ष्य पंजाबान 16वे ओव्हरींत पुराय करतना 5 बाद 160 धांवड्यो केल्यो.
लिव्हिंगस्टोनाक 6 धांवड्याचेर वॉशिंग्टन सुंदरान दिल्लें जीवदान हैदराबादाक बरेंच म्हारग पडलें. मात तांच्या ह्या जैताचें मुळावण ओपनर जॉनी बेयरस्टो आनी शिखर धवन ह्या ओपनरांनी घातलें. बेयरस्टोन 15 बॉलांत 23 जाल्यार धवनान 32 बॉलांत 39 धांवड्यो केल्यो. शाहरूख खानान 10 बॉलांत 19 जाल्यार जितेश शर्मान 7 बॉलांत तीन चौके आनी एक सक्यान 19 धांवड्यो केल्यो. हैदराबादाच्या फजहल हकान 2 विकेटी घेतल्यो.
आयपीएलाचे निमणे लीग मॅचींत सनरायझर्ज हैदराबादान पयलीं खेळून आपल्या डावांत 8 बाद 157 धांवड्यो करून जैता खातीर पंजाब किंग्जाक 158 धांवड्यो करपाचें आव्हान दिलें. हैदराबादा खातीर सगल्यांत चड धांवड्यो अभिषेक शर्मान केल्यो. ताणे 32 बॉलांत 5 चौके आनी 2 सक्यांनी 43 धांवड्यो केल्यो. निमाण्या ओव्हरींती वॉशिंग्टन सुंदर आनी रोमारियो शेफर्डान आक्रमक खेळी करून 29  बॉलांत 58 धांवड्याची भर घातली. वॉशिंग्टनात 19 बॉलांत 3 चौके आनी एक सक्यान 25 धांवड्यो केल्यो जाल्यार शेफर्डान 15 बॉलांत दोन चौके आनी 2 सक्यांनी नांबाद 26 धांवड्यो केल्यो.
पंजाबाच्या हरप्रीत बराराचे बॉलिंगे सामकार हैदराबादच्या बॅट्समनांक रन काडप कुस्तार जालें. ताणे आपल्या 4 ओव्हरींत 26 धांवड्यो दिवन 3 विकेटी घेतल्यो. पयलीं ताणे राहुल त्रिपाठीक 20 धांवड्याचेंर आवट केलें. उपरांत पुराय सेट जाल्ल्या अभिषेक शर्माक 43 धांवड्याचेर पॅव्हेलियनांत धाडलें.  ह्या दोगांक आवट करतगीर ताणे मार्करमाक आवट केलें आनी हैदराबादाची स्थिती  4 बाद 87 अशी केली. मार्करमान  17 बॉलांत 21 धांवड्यो केल्यो. नाथन एलिसान 40 धांवड्यांत 3 विकेटी घेवन हैदराबादचो डाव गुठलावपाक मजत केली. हैदराबादाचे पांच बॅट्समन पांचा परस चड धांवड्यो करपाक शकले नात मुंबय इंडियन्सा आड 42 धांवड्यो करपी प्रियम गर्गाक कगिसो रबाडान मयांक अगरवाल्या वरवीं कॅच आवट केलें. हे मॅचींत तो फकत 4 धांवड्यो करपाक शकलो.