आयटी कडल्यान आतां मेरेन 286 टॉवर्सांक ‘एनओसी’

भांगरभूंय | प्रतिनिधी

सुमार 170 टॉवर्स उबारपाचें काम पुराय

पणजी : गोवा टेलिकॉम धोरणा खाला म्हायती-तंत्रज्ञान खात्यान (आयटी) आतां मेरेन 286 टॉवर्सांक हरकत ना दाखले (एनओसी) दिल्यात. तातूंतले सुमार 170 टॉवर्स उबे रावल्यात, अशी म्हायती खात्याचे संचालक प्रवीण वळवटकार हांणी दिली.
मोबायल तशेंच इंटनॅटाचे जाळे पातळावपाक गोंयांत टाॅवर्सांची मोट्या प्रमाणांत गरज आसा. ते खातीर गोवा टेलिकॉम धोरण चालीक लावन इंटरनॅटाचे जाळे पातळावपाक सरकारान ग्रामीण वाठारांत चडांत चड टॉवर्स उबारपाचो निर्णय घेतला. पूण कांय वाठारांतल्या नागरिकां कडल्यान हाका खर विरोध जाता. हे फाटभुंयेर धोरणाची अंमलबजावणी सुरू जाले उपरांत गोंयांत कितल्या टॉवर्सांची उबारणी जाल्या हाची म्हायती घेतल्यार, आयटी खात्यान आतां मेरेन 286 टॉवर्सांक ‘एनओसी’ दिल्या. तातूंतले सुमार 170 टॉवर्स उबे जाल्यात, अशें वळवटकार हांणी सांगलें.
आतां मेरेन ज्या टॉवर्सांक परवाने दिल्यात, तातूंत बीएसएनएल, जीओ तशेंच हेर खाजगी टॉवर्सांचो आस्पाव आसा.
खात्या कडेन ऑनलायन पद्दतीन अर्ज आयले उपरांत फुडली प्रक्रिया पुराय करून अर्जांक बेगोबेग मंजुरी दितात. ते उपरांत ह्या धोरणांत नोडल एजन्सी आशिल्ल्या भौशीक बांदकाम खात्या वरवीं टॉवर्स उबारपाचें काम हातांत घेतात, अशें तांणी म्हणलें.
मजगतीं, कोवीड काळांत राज्यांतल्यो भोवतेक शाळा जायते म्हयने बंद उरिल्ल्यो. अशें स्थितींत सरकारान आॅनलायन पद्दतीन शिक्षण दिवपाचो निर्णय घेतिल्लो. पूण ग्रामीण वाठारांनी इंटरनॅट नाशिल्ल्यान विद्यार्थ्यांक ऑनलायन पद्दतीन शिक्षण घेवप कठीण जाल्ले. ताचो फटको विद्यार्थ्यांक बशिल्लो. ते खातीर फुडारांत विद्यार्थ्यांचे शिक्षणीक लुकसाण जावचें न्हय, म्हूण सरकारान इंटरनॅट जाळे वाडोवपाचो निर्णय घेतला. ते खातीर टॉवर्सांची गरज आसा. पूण सध्या टॉवर्सांक जावपी विरोध पळयल्यार सरकारा मुखार नवें आव्हान निर्माण जालां.

इमारतींचेर उबारतले टॉवर्स
भौशीक बांदकाम खात्याच्या राज्यभरांतल्या पोरण्या इमारतींचेर मोबायल टॉवर्स उबारपाचो निर्णय सरकारान घेतला. इंटरनॅटाचे जाळे पातळावपा वांगडाच भौशीक बांदकाम खात्याक हातूंतल्यान महसूल मेळटलो. अशा इमारतींची पळोवपी करपाचें काम खात्या कडल्यान सुरू आसा.