भांगरभूंय | प्रतिनिधी
मुरगांवः वास्को चवथीच्या बाजाराक 29 ऑगस्ट सावन सुरवात जाली. माटोळी खातीर लागपी साहित्य तशेंच गरजेच्या जिन्नसांनी बाजारपेठ भरल्या. खरेदी खातीर लोकांची गर्दी जावपाक लागल्या. मंगळारा ह्या बाजारांत लाखांनी रुपयांची उलाढाल जावपाची शक्यताय आसा.
वास्को बाजारांत माटोळीचें सामान व्हड प्रमाणांत विकपाक आयलां. मात पोरूं परस चडशा साहित्याचें दर वाडल्यात. नाल्लाची पेण 300 ते 800 रुपया, बेड्यांचे कात्रे 300 रुपया सावन सुरवात, केळम्याच्यो शिरत्यो 50 नग 200 रुपयांक, केवणीचे दोर 50 ते 100 रुपया, माटा 40 ते 60 रुपया जोड, तोरगां 100 रुपयांक एक, आंबाडे 100 रुपयांक 50, चिबूड 80 रुपया, निरपणस 100 ते 300 रुपयांक एक, गौरी जुडी 50 रुपया, हळडीचीं पानां 50 रुपयांक 25, तोर 100 रुपयांक एक, ल्हायो 20 रुपयांक 100 ग्राम अशे दर आसात.
दोन वर्सां उपरांत कसलेच निर्बंध नासतना अंदूंची चवथ 31 ऑगस्ट सावन सुरू जाता. हे फाटभुंयेर खूबशा लोकांनी सोरोमा खरेदी खातीर गर्दी केल्ली. माटोळीक लागपी साहित्या वांगडाच सजावटी खातीर लागपी विवीध आकाराच्यो फोली, फुलां, मखरां हाचे सयत फोगाचींय दुकानां बाजारांत दिश्टी पडटात. कृत्रीम फुलांचे हार एका मिटराक 160 ते 300 रुपया, गणपतीक घालपाचे हार 500 रुपया मेरेन, लायटीच्यो माळो 200 ते 800 रुपया अशे दर आसात. चवथीच्या तोंडार भाजयेची मागणी वाडल्या. गांवगिऱ्या बायलो बाजारांत गांवठी भाजी घेवन बसल्यात. तातूंत तांबडी भाजी, चवळेच्या वालाची भाजी तशेंच फळांचो आस्पाव आसा. तांचो दर स्थीर आसा. आपोल 120 ते 140 रुपया, सीताफळ 120 रुपया, डाळींब 160 रुपया, संत्रां 2500, पेरां 200 रुपया दर किलो असो दर आसा. जाल्यार केळीं 60 ते 80 रुपया डझन मेळटात.
30 टक्के म्हारगाय…
बाजारांत आयिल्ल्यो वस्तू 30 टक्के म्हारग जाल्यात. ताचो सर्वसामान्य लोकांक धग लागला. बाजारांत रेडिमेड वस्तूंचीं दुकानां, सजावटीच्या सामानांचीं दुकानां, लांकडी वस्तू, मखरां अशें साबार साहित्य विकपाक आयलां. तांचे दर लेगीत 20 ते 25 टक्क्यांनी वाडलां. म्हारगाय आसून लेगीत चवथीचे खरेदी खातीर म्हालांतल्या विवीध वाठारांतल्या लोकांनी खरेदी खातीर गर्दी करपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
