भांगरभूंय | प्रतिनिधी
लॉर्ड्सः ऑस्ट्रेलिया आनी दक्षीण आफ्रिका ह्या पंगडां मदीं चालू आशिल्ले संवसारीक टॅस्ट वस्तादपण सर्तीचे फायनलीच्या दुसऱ्या दिसाय परतून एकदा बॉलरांचो शेक पळोवपाक मेळ्ळो.
दोनूय पंगडांच्या फास्ट बॉलरांनी जबरदस्त कामगिरी करून मॅच उमळशीक वाडोवपी स्थितींत हाडली. दुसऱ्या दिसाचो खेळ सोंपलो त्या वेळार ऑस्ट्रेलिया पंगडान आपल्या दुसऱ्या डावांत 8 विकेटी व्हगडावन 144 धांवड्यो केल्यो. अशे तरेन ताची वट्ट आघाडी 218चेर पावली.
दक्षीण आफ्रिकेचो पयलो डाव फकत 136 धांवड्यांचेर सोंपलो, जाल्यार ऑस्ट्रेलियेन आपल्या पयल्या डावांत 212 धांवड्यो केल्ल्यो.
काल सकाळीं दक्षीण आफ्रिका पंगडान 4 बाद 43 धांवड्यां वयल्यान मुखार खेळपाक सुरवात केली. टॅम्बा बवुमा (35) आनी डॅव्हिड बेडिंगहॅम (32) हांणी पांचवे विकेटी खातीर 50 धांवड्यांची भागिदारी करून पंगडाक सांबाळ्ळो. बवुमान विशेशतः पॅट कमिन्स आनी मिचेल स्टार्क ह्या बॉलरांक तोंड दितना आक्रमक खेळ केलो. पूण, दुसऱ्या सत्रांत पॅट कमिन्सान उत्कृश्ट बॉलींग करतना दक्षीण आफ्रिकेचो डाव गडगडायलो. कमिन्सान 6 विकेटी घेतल्यो. ताणें टॅस्टींत 300 विकेटी घेतल्यो. ताका लागून ताचें नांव लॉर्ड्सच्या ऑनर्स बोर्डाचेर लागलें. ताणें काइल व्हेरेन, मार्को जान्सेन आनी हेडिंगहॅम आनी कगिसो रबाडाक तंबूंत धाडले. जोश हेझलवूड आनी मिचेल स्टार्क हांणी दरेकी 2 विकेटी घेतल्यो. जाल्यार नॅथन लायनान एक विकेट मेळयली.
दक्षीण आफ्रिकेचो डाव 136 धांवड्यांचेर सोंपलो आनी ऑस्ट्रेलियेक पयल्या डावाच्या आदाराचेर 74 धांवड्यांची म्हत्वाची आघाडी घेतली.
ऑस्ट्रेलियेन आपल्या दुसऱ्या डावाची सुरवात सादूरतायेन केली. पूण, दक्षीण आफ्रिकेच्या बॉलरांनी तांचेर सुरवाती सावन चेपण दवरलें. कगिसो रबाडान परतून एकदा आपलो ठसो उमठयलो.
उस्मान ख्वाजा (6) आनी कॅमरून ग्रीन हांकां (0) हांकां रोखडेच बाद करून ऑस्ट्रेलियेची स्थिती 2 बाद 28 अशी केली. स्टिव्ह स्मिथ आनी मार्नस लाबशेन हांणी कांय वगत संयमी खेळ केलो. पूण, लुंग एनगिडी आनी वियान मुल्डर हांणी मदल्या सत्रांत ऑस्ट्रेलियेचे मदले फळयेक धपके दिले. मुल्डरान ट्रॅव्हिस हेडाक (9) बोल्ड केलो. जाल्यार एनगिडीन ब्यू वेबस्टराक (9) एलबीडब्ल्यू बाद केलो. ऑस्ट्रेलिया 7 बाद 74 असो संकश्टांत सांपडिल्लो. अॅलेक्स कॅरी (43) आनी मिचेल स्टार्क (खेळटा 16) हांणी आठवे विकेटी खातीर 60 धांवड्यांची भागिदारी करून ऑस्ट्रेलियेक संकश्टांतल्यान भायर काडपाचो यत्न केलो. कॅरीन 50 बॉलांनी पांच चवक्यां सयत आक्रमक खेळ केलो. पूण, रबाडान ताका एलबीडब्ल्यू बाद करून ही भागिदारी फोडली.
रबाडान दुसऱ्या डावांत 3 विकेटी घेतल्यो, जाल्यार एनगिडीन लेगीत तीन विकेटी मेळयल्यो. दुसऱ्या दिसाचो खेळ सोंपलो त्या वेळार ऑस्ट्रेलियेन 8 विकेटी व्हगडावन 144 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
