आयच्यान वन डे माळ

भांगरभूंय | प्रतिनिधी

आयच्यान भारत आनी दक्षीण आफ्रिका ह्या पंगडां मदीं वन डे माळेक सुरवात जाता. लखनौच्या इकाना आंतरराष्ट्रीय क्रिकेट स्टेडियमाचेर पयले खेपे मॅच जातली. सदचो मुखेली रोहित शर्माचे गैरहाजेरेंत दावखुरो बॅट्समन शिखर धवन पंगडाचें फुडारपण करतलो.

फाटल्या दोन वर्सां सावन वन डे क्रिकेटींत सेगीत बरें प्रदर्शन करपी शिखर धवन तंदुरुस्त रावन फुडल्या वर्सा भारतांत जावपी संवसारीक वन डे क्रिकेटींत खेळपाक इत्सूक आसा.

ह्या म्हयन्यांत ऑस्ट्रेलियेंत जावपी संवसारीक टी-20 सर्ती खातीर निवड समितीन दक्षीण आफ्रिके आडचे वन डे माळे खातीर रोहित शर्मा, विराट कोहली, मोहम्मद शमी आनी आर आश्विन हांकां विसव दिला. निवड समितीन मुकेश कुमार आनी रजत पटीदार ह्या नव्या चेरांक संद दिल्या. संवसारीक टी-20 सर्ती खातीर वेंचिल्ल्या राखीव खेळगड्यांची लेगीत वन डे माळे खातीर निवड केल्या.

संवसारीक टी-20 सर्ती खातीर राखीव खेळगड्यां मदीं आशिल्ल्या श्रेयस अय्यराक वन डे माळे खातीर उपमुखेली केला. तशेंच फास्ट बॉलर दीपक चाहर आनी रवी बिश्नोई ह्या राखीव खेळगड्यांचो लेगीत वन डे पंगडांत आस्पाव केला.

धवना वांगडा शुभमन गिल डावाची सुरवात करपाक शकता. फाटल्या कांय वन डे मॅचींनी गिलान बरें प्रदर्शन केलां.

राहुल त्रिपाठी वा पटीदार हातूंतल्यान एकल्याक आयज आंतरराष्ट्रीय क्रिकेटींत पदार्पण करपाची संद मेळुये.

पटीदारान देशांतर्गत क्रिकेटींत उत्कृश्ट प्रदर्शन केलां. ताचें ताका मोल मेळ्ळें. ऋतुराज गायकवाड, संजू सॅमसन आनी इशान किशन हे मदले फळयेंत बॅटिंग करतना दिसुये.

फास्ट बॉलींग विभाग शार्दुल ठाकूर, चाहर, आवेश खान आनी मोहम्मद सिराज हे सांबाळटले. तांकां मुकेशाच्या रुपान नवो चेरो मेळ्ळा.

नवोदीत खेळगडे अणभवी खेळगड्यांचे गैरहाजरेंत बरें प्रदर्शन करून फुडल्या वर्सा जावपी संवसारीक सर्ती खातीर आपली पंगडांतली सुवात घट करपाक शकतात. पूण, भारता खातीर ही माळ सोंपी आसची ना. दक्षीण आफ्रिका अणभवी खेळगड्यांक घेवन आयला. क्विंटन डी कॉक, मुखेली तेंबा बावुमा, एडेन मार्करम, डॅवीड मिलर, रेझा हॅण्ड्रिक्स आनी जेन्नेमॅन मलन हे अणभवी खेळगडे बॅटींग विभाग सांबाळटले.

तशेंच बॉलींग विभागांत लुंगी एनगिडी, अॅनरीच नॉर्जे, वेन पर्नेल, कगिसो रबाडा, ड्वेन प्रेटोरियस हे आसात.