भांगरभूंय | प्रतिनिधी
बेतुलांत 12 लाख चौखण मिटर जागो उपलब्ध
भांगरभूंय प्रतिनिधी
पणजी : आयआयटी प्रकल्पा खातीर काणकोण, मेळावली, सांगें अशा साबार जाग्यांचो विचार जालो. ह्या सगल्या थळांचेर लोकांनी विरोध केलो. ताका लागून थंय आयआयटी प्रकल्प रद्द जालो. आतां केपें मतदारसंघांत बेतुल – किटला हांगा आयआयटी स्थापन करपाचो प्रस्ताव आमदार एल्टन डिकॉस्ता हांणी मांडलाे.
आयीडीसी भूखंड गैरवेव्हाराचेर सभाघरांत चर्चा सुरू आसली. चर्चेत वांटो घेतना आमदार एल्टन डिकॉस्ता हांणी बेतुल – किटला हांगाच्या जाग्याचो उल्लेख केलो. बेतुलांत 12 लाख चौखण मिटर जागो आसा. ह्या जागेंत झाडां नात, दोंगर नात. पर्रीकार संरक्षण मंत्री आसतना ह्या जाग्याचेर ‘डिफेन्स एक्स्पो’ जाल्लें. ह्या जाग्याचे सरकार कितें करतले, असो प्रस्न तांणी केलो. ह्या जाग्याचेर आयआयटी प्रकल्प जावपाक हरकत ना, अशें मत आमदार एल्टन डिकॉस्ता हांणी उक्तायलें.
ह्या जाग्याचें कितें करचे, हे आमदारान सांगचें. तांचे सुचोवणे प्रमाण सरकार निर्णय घेतले, अशें मंत्री मॉवीन गुदिन्हो हांणी सांगलें.
आयआयटी खातीर सरकार जाग्याचो सोद घेता. जागो जाहीर केले उपरांत लोकांचो विरोध जाता. आतां मेरेन निश्चीत केल्ल्या सगल्या जाग्यांक विरोध जाला, अशें मुख्यमंत्री डॉ. प्रमोद सावंत हांंणी बुधवारा विधानसभेंत स्पश्ट केल्ले. जागो निश्चीत जाले उपरांत घोशणा करपाचे सरकारान थारायिल्ल्याचे तांणी सांंगलें.
दुसरे दिसा आमदार एल्टन डिकॉस्ता हांणी केपेंचो प्रस्ताव आयआयटी खातीर सुचयला. लोकांचो विरोध आसलो तरी आयआयटी खातीर आमदारां मदीं सर्त सुरू आसा. भलायकी मंत्री विश्वजीत राणे हांणी वाळपय मतदारसंघांत मेळावलीचो प्रस्ताव तयार केल्लो. मेळावली हांगा खर विरोध जालो. हाचे उपरांत मंत्री सुभाष फळदेसाय हांणी सांगेंच्या जाग्याचो प्रस्ताव सादर केलो. सांगेंतलो जागो केंद्रान अयोग्य थारायला. हे फाटभुंयेर आतां बेतुल किटलाच्या जाग्याची भर पडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
