भांगरभूंय | प्रतिनिधी
लेखी बाजू मांडपाक 8 आमदारांक 6 सप्तकांची मुजत
भांगरभूंय प्रतिनिधी
पणजी : काँग्रेसींतल्यान भाजपांत प्रवेश केल्ल्या 8 आमदारां आड दाखल जाल्ल्या अपात्रताय याचिकेचेर सोमारा सभापती रमेश तवडकार हांचे मुखार सुनावणी जाली. आमदारांनी लेखी बाजू मांडपाक 6 सप्तकांची मुजत मागिल्ल्यान सुनावणी 5 एप्रील मेरेन फुडें धुकल्ल्या. दिगंबर कामत आनी मायकल लोबो हांचे आड प्रदेश काँग्रेस अध्यक्ष अमीत पाटकार हांणी दाखल केल्ले याचिकेचेर सुनावणी जाली. ही सुनावणी 6 मार्च मेरेन फुडें धुकल्ल्या.
आमदारांक अपात्र करपाच्या मागणेच्यो तीन याचिका सभापती मुखार आसा. हातूंतल्या दोन याचिकांचेर सभापती रमेश तवडकार हांचे मुखार सोमारा सुनावणी जाली. गिरीश चोडणकार हांणी दाखल केल्ली याचिका सुनावणेक आयली ना.
दिगंबर कामत, मायकल लोबो, डिलायला लोबो, केदार नायक, रुडाल्फ फर्नांडीस, राजेश फळदेसाय, संकल्प आमोणकार आनी आलेक्स सिक्वेरा ह्या आठ आमदारांनी सप्टेंबरात भाजपांत प्रवेश केल्लो. काँग्रेसींत वेगळा गट स्थापन करून तांणी हो गट भाजपांत विलीन केल्लो. तांचो हो प्रवेश बेकायदा थारता. आठ आमदारांक अपात्र करपाची मागणी करपी याचिका डॉमनीक नोरोन्हा हांणी सभापती मुखार दाखल केल्या. हे यचिकेचेर सुनावणी जाली.
शुक्रारा आमकां नोटिसो मेळ्ळ्यात. अभ्यास करून बाजू मांडपाक आमी वेळ मागला. सभापती कार्यालयान 6 सप्तकांची मुजत दिल्या. फुडली सुनावणी 5 एप्रीलाक जातली, अशी म्हायती प्रतिवादी आमदारांच्या आदोगादान दिली.
आमदार एका पक्षाच्या उमेदवारीचेर वेंचून येता. उपरांत तो दुसऱ्या पक्षांत प्रवेश करता. ज्या हेतान मतदारांनी ताका वेंचून दिल्लो आसता, तो हेत नश्ट जाता. मतदारांचेर हो अन्याय आसा. मतदारांक न्याय मेळोवन दिवपा खातीर आपणें ही याचिका दाखल केल्या, अशें याचिकादार डॉमनीक नोरोन्हो हांणी सांगलें.
दोनूय याचिकेचेर सुनावणी जाली. गिरीश चोडणकार हांचे याचिकेचेर सुनावणी जावंक ना, अशें सभापती रमेश तवडकार हांणी सांगलें. सभापती मुखार जी याचिका दाखल केल्या, ताचेर बेगिन सुनावणी घेवपाचे आदेश दिवचें, अशी मागणी करपी याचिका गिरीश चोडणकार हांणी खंडपिठांत दाखल केल्या. खंडपिठांत हे याचिकेचेर सुनावणी सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
