भांगरभूंय | प्रतिनिधी
कला अकादमी निविदा प्रकरण; अधिकाऱ्यां कडल्यान मागयल्यात फायली
पणजी: कला अकादमीच्या बांदकाम प्रक्रियेची निविदा कला संस्कृती खात्यान न्हय जाल्यार भौशीक बांदकाम खात्यान काडल्या अशें कला आनी संस्कृती मंत्री गोविंद गावडे हांणी सांगिल्लें. हाचेर काल (बिरेस्तारा) भौशीक बांदकाम मंत्री निलेश काब्राल हांणी आपल्या कार्यकाळांत ही निविदा काडिल्ली ना. आदल्या मंत्र्यान काडिल्ली आसत जाल्यार आपूण ताची चवकशी करतलों. खात्याच्या अधिकाऱ्यां कडेन फायली मागयल्यात अशें स्पश्टीकरण भौशीक बांदकाम मंत्री निलेश काब्राल हांणी दिलें.
कला अकादमीची निविदा बांदकाम खातें आनी कला संस्कृती खातें एकामेकाचेर धुकलीत आसात. कला अकादमी बांदकामाच्या 50 कोटींची निविदा हो मोटो विशय जाला आनी हें प्रकरण आतां मुख्यमंत्र्या मेरेन वचपाची शक्यताय आसा. कला अकादमीच्या इमारतीच्या नुतनीकरणा संबंदीच्यो फायली मागयिल्ल्याचें मंत्री निलेश काब्राल हांणी सांगलें.
अधिकाऱ्यां कडेन केल्ले मुळावे चवकशेंत विशिश्ट कंत्राटदारा विशींची सुचोवणी कला आनी संस्कृती खात्यान केल्ल्याचें स्पश्ट जालां. आपूण त्या वेळार मंत्री नाशिल्लों. जो मेरेन फायली पळयना, तो मेरेन आतांच उलोवप शक्य जावचें ना. ह्या प्रकरणांत मुख्यमंत्री कितें तो निर्णय घेतले. भौशीक बांदकाम खात्या वतीन आपूण ह्या विशयाची सगली म्हायती उपलब्ध करून दितलों अशेंय मंत्री काब्राल हांणी म्हणलें.
कला अकादमीच्या बांदकामा वयल्यान मंत्री गोविंद गावडे हांकां सगल्या पांवड्या वयल्यान धारेर धरतात.
भाजपाचे म्हणयारे सावियो हांणी ह्या निविदा प्रकरणांत मंत्री गोविंद गावडे हांणी भ्रश्टाचार केला असो आरोप करून मुख्यमंत्र्यांनी हाची दखल घेवन ह्या प्रकरणाची चवकशी करपाची मागणी केल्या. तशेंच गोवा फॉरवर्ड, आप ह्या राजकी पक्षांनी लेगीत कला अकादमीच्या कामांत भ्रश्टाचार जाल्ल्याचो आरोप करून चवकशेची मागणी केल्या.
पूण मंत्री गोविंद गावडे हांणी कसलेच तरेचो भ्रश्टाचार जावंक ना. आमी पारदर्शक काम केल्ल्याचें स्पश्टीकरण दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
