भांगरभूंय | प्रतिनिधी
मायकल लोबोः काँग्रेसींतूय आपल्याचेर आरोप जाल्याचो दावो
भांगरभूंय । प्रतिनिधी
पणजीः काँग्रेसींत आसतना आपल्याचेर जाल्ले आरोप राजकी हेतून प्रेरीत आशिल्ले. राजकारण, समाजकारणांत आशिल्ल्यान आपल्याचेर विवीध तरांचे आरोप जायत रावतले. आपणे कांयच चुकीचें करूंक ना, अशें भाजपा आमदार मायकल लोबो हांणी पत्रकारां कडेन उलयतना स्पश्ट केलें.
भाजपांत वच्चे आदीं मायकल लोबो काँग्रेसींत आशिल्ले. ते भायर ते विरोधी पक्ष फुडारीपदारूय आशिल्ले. त्या वेळार नगर नियोजन मंत्री विश्वजीत राणे हांणी लोबो हांकां आरोपीच्या पांजऱ्यांत उबो केल्लो. लोबो हांणी नगर नियोजन कायदो मोडून हॉटेलां बांदल्यांत, असो आरोप मंत्री राणे हांणी केल्लो. ते भायर ते संबंदांतलो अहवाल लेगीत विधानसभा पटलाचेर दवरिल्लो. ते वयल्यान भाजपा प्रदेशाध्यक्ष सदानंद तानोवडे हांचे सयत भाजपाच्या खूबशा फुडाऱ्यांनी लोबो हांचेर टिका केल्ली. ते उपरांत मायकल लोबो काँग्रेस सोडून भाजपांत परतून गेलो. हे फाटभुंयेचेर तुमचेर आरोप जावचे नात कांय कितें, असो प्रस्न पत्रकारांन तांकां केलो.
ह्या प्रस्नाक जाप दितना लोबो हांणी सांगलें, आपूण आठ वर्सां उत्तर गोंय नियोजन उदरगत प्राधिकरणाचो (एनजीपीडीए) अध्यक्ष आशिल्लों. त्या वेळार आपल्याचेर आरोप जावंक नात. पूण काँग्रेसींत गेले उपरांत आनी वेंचणूक जिखले उपरांत मात आरोप सुरू जाले. तातूंतल्यान हे आरोप राजकी हेतून केल्ले, हेंच स्पश्ट जाता, अशें लोबो हांणी सांगलें.
राजकारण आनी समाजकारणांत सक्रीय आशिल्ल्यान अशे तरेचे आरोप हे आदीं जाल्यात आनी हे फुडेंय जातले. पूण आपले आड कागाळ जाले उपरांत भ्रश्टाचार विरोधी पंगडान चवकशी करून अहवाल सादर केल्लो. तातूंत आपणे कायदो मोडून कसलेंच बांदकाम करूंक ना, हें स्पश्ट जालें. ताका लागून ह्या विशया वयल्यान आपल्याचेर जावपी आरोपांत तथ्य ना, अशें लोबो हांणी नमूद केलें. मजगतीं, काँग्रेसींतल्यान भाजपांत गेल्ल्या आमदारां मदल्या कोणांक मंत्रीपदां दिवचीं, हें अजून निश्चीत जावंक ना. आमी बिनशर्त भाजपांत गेल्यात. ताका लागून मंत्रीपदाची आस्त ना, अशेंय लोबो हांणी स्पश्ट केलें.
युरी आलेमांव हांकां दिली परबीं
40 आमदारांचे विधानसभेंत विरोधी पक्षा कडेन धा जाणांक एक ह्या प्रमाणांत चार आमदार आसत जाल्यारूच विरोधी पक्ष फुडारीपद दिवपाक मेळटा, असो कायदो ना. काँग्रेसी कडेन सध्या तीन आमदार आसात. ताका लागून सगळ्यांत व्हड विरोधी पक्ष काँग्रेसूच आसा. ताका लागून सभापतीन काँग्रेसीक विरोधी पक्ष फुडारीपद दिवपाक मंजुरी दिली. ह्या पदाचेर युरी आलेमांवाची निवड जाल्या. युरीक आपलो शुभेत्सा, अशें मायकल लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
