आनीक कांय मुखेल मार्गांचें जातलें राष्ट्रीयीकरण

भांगरभूंय | प्रतिनिधी

मुख्यमंत्रीः कदंबाचो डिजिटल, ग्रीन एनर्जीच्या वापराचेर भर

भांगरभूंय I प्रतिनिधी
पणजी : राज्यांत आनीक कांय मुखेल मार्गाचें राष्ट्रीयीकरण करतले. हातूंत खाजगी बशींचो आस्पाव आसतलो. फुडारांत कदंबाचे तिकेटी सयत हेर सेवा डिजिटल माध्यमाचेर उपलब्ध करून दिवपाचेर सरकाराचो आनी कदंब म्हामंडळाचो भर आसतलो. नागरिकांक चडांत चड सुविधा उपलब्ध करून दिवप तशेंच खाजगी बशींच्या धनयां वांगडा चर्चा करून एकवटींत काम करपाचेर चर्चा सुरू आसा, अशी म्हायती मुख्यमंत्री डॉ. प्रमोद सावंत दिली.
 कदंब म्हामंडळाच्या 41व्या वर्धापन दिसा निमतान आयोजीत कार्यावळींत मुख्यमंत्री उलयताले. सध्या म्हामंडळ तोट्यांत आसले आनी नवीन इलेक्ट्रीक बशी आयल्यो तरी कर्मचाऱ्यांक कामा वयल्यान काडचे नात. राज्यांत ज्या मार्गार बससेवा ना थंय बसेस सुरू करपा विशीं चर्चा सुरू आसा. फुडल्या दसऱ्या मेरेन राज्यांत सर्वोत्तम सुविधा दिवपाचो यत्न आसा, अशें मुख्यमंत्री डॉ. सावंत हांणी सांगलें.
डिझेला पसून जावपी प्रदुशण टाळपाक इलेक्ट्रीक वाहनांचो (ग्रीन एनर्जी) वापर वाडोवपाचेर भर आसा. केंद्रीय पांवड्यार सुरू केल्ल्या ‘गतीशक्ती’ मोहिमेच्या माध्यमांतल्यान जम्मू-काश्मीर ते कन्याकुमारी मेरेन आनी पूर्व ते अस्तंते मेरेन कदंबाची सेवा उपलब्ध करपाचें लक्ष्य आसा.
 राज्यांत येवपी काळांत लॉजिस्टीकांत चड संद निर्माण जातल्यो. तरणाट्यानी हे विशीं शिक्षण घेवपाक सुरवात करची, अशें आवाहन मुख्यमंत्र्यान केलें.
ह्या वेळार येरादारी मंत्री मॉवीन गुदिन्हो हांणी जायरातीच्या माध्यमांतल्यान ‘फूटकॉल’ आनी नफो वाडोवपाचो यत्न करतले, अशें सांगलें. मल्टिमॉडेल ट्रान्सपोर्टच्या माध्यमांतल्यान सगल्या प्रकाराची येरादारी वेवस्था करप सहज शक्य जातले, अशें तांणी सांगलें.
कदंब म्हामंडळाचे अध्यक्ष आनी आमदार उल्हास तुयेंकार हांणी डिजिटल तिकेट, क्युआर कोड, कार्ड पेमेंट सारक्या सुविधांचो वापर वाडोवन कागदांचो वापर उणो करतले, अशें सांगलें.
ह्या वेळार येरादारी विभागाचे संचालक राजेंद्र सातार्डेकार, मंडळाचे वेवस्थापकीय संचालक डेरेक नेटो, वेवस्थापक संजय घाटे, उज्ज्वला नायक आनी हेर मानेस्त हाजीर आशिल्ले.
कार्यावळींत कदंबाच्या कर्मचाऱ्यांचो भोवमान केलो. तशेंच म्हामंडळाच्या यादस्तीकेचे अनावरण जालें.