भांगरभूंय | प्रतिनिधी
भांगरभूंय । प्रतिनिधी
वाळपयः आंबेडें- नगरगांव हांगच्या डॉ माधुरी भारद्वाज आनी डॉ ब्रिज मोहन भारद्वाज हांच्या सहकार्यान सुरू केल्ल्या अपना घर आश्रमाचें उक्तावण आदलो आमदार मोहन आमशेकार, नगरगांवची सरपंच संध्या खाडीलकार, राजेंद अभ्यंकर आनी म्हाळू गांवस हाचे हाजेरेंत जालें.
नगरगांव पंचायत वाठारांत सुरू केल्ल्या ह्या अपना घर आश्रमांत गरीब, बेवारस, बेघरांक आलाशिरो मेळटलो अशी आस्त संध्या खाडीलकार हिणे उक्तायली. समाजाची विस्टटल्ले घडी हांका लागून लोकांक जायत्या समस्यांक तोंड दिवचें पडटा. संघर्शाक तोंड दितना तांची परिस्थिती हलाखीची जाता. अश्या लोकांक निमाणे आश्रमांत वच्चें पडटा अशें तिणे फुडें सांगलें.
देशांत अपना घर सारके आश्रम जायते कडेन आसात. गोंयांत हो पयलो आश्रम नगरगांव वाठारांत सुरू केला. ह्या सामाजीक प्रकल्पा खातीर महादेव कासार हांणी आपली जमीन दान दिल्या अशी म्हायती मोहन आमशेकार हांणी दिली. संतोष महानंदू नायक हांणी आश्रमातं वैजकी तपासणी, जेवण, कपडे मुफत उपलब्द करून दितले अशें सांगलें.
ह्या आश्रमांत 30 खाटेंची वेवस्था आसा. तातूंत वाड करून ती 50 करतले अशें आश्रमाच्या जाळवणदारांनी सांगलें. दिवली पेटोवन आश्रमाचें उक्तावण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
