भांगरभूंय | प्रतिनिधी
भांगरभूंय I प्रतिनिधी
मुरगांव ः आंतरराष्ट्रीय योग दिसा निमतान गोंयांत विंगडविंगड योग शिबिरां आयोजीत केल्यांत. भारत स्वाभिमान न्यास, पतंजली योग समिती, महिला पतंजली योग समिती, पतंजली किसान सेवा समिती आनी युवा भारत मुरगांव हांच्या जोड पालवान सामूहिक योग कार्यावळ वास्कोच्या दक्षीण पश्चीम रेल्वे समुदाय सभाघरांत 21 जूनाक सांजवेळा 4 ते 6 मेरेन आयोजीत केल्या.
हे कार्यावळीक मुख्यमंत्री डाॅ. प्रमोद सावंत, पंचायत मंत्री माविन गुदिन्हो, मुरगांवचे आमदार संकल्प आमोणकार, मुरगांवचे नगराध्यक्ष दामोदर कासकार, नगरसेवक, मुरगांव म्हालाचे उपजिल्हाधिकारी रविशेखर निपाणीकार, मामलेदार रघुराज फळदेसाय, पुलीस उपअधिक्षक राजेश कुमार, पुलीस निरिक्षक कपिल नायक आनी हेर सरकारी अधिकारी हाजीर रावतले. आंतरराष्ट्रीय योग दिसा मुरगांव म्हालांतल्या लोकांनी व्हडा संख्येन वांटेकार जावचें अशें आवाहन दक्षीण गोंय पतंजली योग समितीचे प्रसिद्दी मुखेल प्रकाश गांवस हांणी केलां.
नवेवाडे-वास्कोच्या श्रीमाता सभाघरांत घडोवन हाडिल्ले पत्रकार परिशदेंत ते उलयताले. ह्या वेळार तांचे वांगडा पतंजली गोंय राज्य प्रभारी विश्वास कोरगांवकार, दक्षीण गोंय पतंजली म्हणयारे लक्ष्मण मांद्रेंकार, पुंडलीक भोसले, संतोष केरकार, गीता आनी हेर पदाधिकारी हाजीर आसले.
आंतरराष्ट्रीय योग दिसाचें निमित्त सादून दरेकान योगाचें ज्ञान घेवचें. सदांच योगासनां केल्यार भलायकी निरोगी उरता अशें गांवस हांणी सांगलें.
पतंजली गोंय राज्य प्रभारी कोरगांवकार हांणी 21जून आंतरराष्ट्रीय योग दीस उमेदीन मनोवपा खातीर फुडाकार घेवचो अशें आवाहन केलें. सगल्यांनी वास्कोच्या दक्षीण पश्चीम रेल्वे सभाघरांत उपस्थिती दाखोवची आनी ह्या शिबिराचो लाव घेवचो असो उलोय कोरगांवकार हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
