भांगरभूंय | प्रतिनिधी
शिक्षण संचालका कडल्यान स्पश्टीकरण
भांगरभूंय I प्रतिनिधी
पणजी : आंगणवाडींनी शिकपी भुरग्यांक व्हड भुरग्यां कडल्यान उर्बा मेळची, ह्या हेतान उच्च माध्यमीक विद्यालयांक आंगणवाडी दत्तक घेवपाची सुचोवणी सरकारान केल्या. उच्च माध्यमीक विद्यालयांनी आंगणवाडी दत्तक घेतले उपरांत संबंदींत आंगणवाडी जंय आसात थंयच सुरू उरतल्यो. ताचेर बायलां अानी भुरगीं उदरत खात्याचोच ताबो आसतलो, अशें शिक्षण संचालक शैलेश झिंगडे हांणी शुक्रारा आमच्या प्रतिनिधी कडेन उलयतना स्पश्ट केले.
राज्यांतल्या उच्च माध्यमीक विद्यालयांनी आंगणवाडी दत्तक घेवच्यो अशी सुचोवणी करपी परिपत्रक शिक्षण खात्यान हालींच जारी केलां. खात्याच्या ह्या परिपत्रका उपरांत जायत्या जाणां मदीं दुबाव निर्माण जाल्लो. हे फाटभुंयेर शिक्षण संचालकांनी हें स्पश्टीकरण दिलां. उच्च माध्यमीक विद्यालयां ज्यो आंगणवाडी दत्तक घेतले थंयच्या भुरग्यांक सप्तकांतल्यान एकदा संबंदींत उच्च माध्यमीक विद्यालयांत व्हरतले. थंयच्या विद्यार्थ्यां मुखार भुरग्यांच्यो विवीध कार्यावळी घेतले. ह्या कार्यावळींक बरो प्रतिसाद दिवन व्हड विद्यार्थ्यांनी आंगणवाडींतल्या भुरग्यांक उर्बा दिवची, विद्यालयांनी आंगणवाडींक गरजेचें सहकार्य करचें, होच उद्देश ह्या निर्णया फाटल्यान आसा, अशें झिंगडे हांणी म्हणलें.
विद्यालयांची आंगणवाडी दत्तक घेवपाची तयारी
शिक्षण खात्यान परिपत्रक जारी केले उपरांत जायत्या उच्च माध्यमीक विद्यालयांनी एका परस चड आंगणवाडी दत्तक घेवपाची तयारी दाखयल्या. उच्च माध्यमीक विद्यालयां आनी आंगणवाडी विद्यार्थ्यांक अशा प्रकारान एकठांय हाडपाची इत्सा प्रधानमंत्री नरेंद्र मोदी हांची आसा. ते प्रमाण गोंयांत हो उपक्रम सुरू केला, अशें शिक्षण संचालक शैलेश झिंगडे हांणी स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
