भांगरभूंय | प्रतिनिधी
आयज 11 ऑक्टोबर. हिंदी सिनेमाचो महानायक अमिताभ बच्चन हांचो जल्मदीस. उत्तर प्रदेशांतल्या अलाहाबाद शारांत 11 ऑक्टोबर 1942 दिसा जल्मल्ल्या अमिताभाच्या बापायचें (हरिवंशराय बच्चन) मुळांत ‘श्रीवास्तव’ अशें नांव आशिल्लें, पूण, तांणी ‘बच्चन’ ह्या टोपण नांवान कविता झेले उजवाडायले. देखून अमिताभान चित्रपट वेवसायांत प्रवेश करतना ‘बच्चन’ हें टोपण नांवूच आपलें आडनांव म्हणून वापरपाक सुरवात केली. फुडें पुराय घराण्याचें आडनांव ‘बच्चन’ अशें रूढ जालें.
अमिताभान आपलें शिक्षण डेहराडूनांत केलें. उपरांत दिल्लीच्या किरोडीमल कॉलेजींतल्यान विज्ञानाची पदवी घेतली. कांय काळ तो कोलकाताच्या एके कंपनींत काम करतालो, पूण थंय तो खोशी नाशिल्लो. थंयच्यान तो हिंदी फिल्म इंडस्ट्रींत नशीब अजमावपाक मुंबय आयलो. आकाशवाणीन ताका आवाज बरो ना, म्हूण न्हयकारलो. तर जायत्या निर्मात्यांनी ताका तो उंच बडी कशी दिसता म्हूण काम दिवंक ना ख्वाजा अहमद अब्बास हांच्या ‘सात हिंदुस्तानी’ ह्या सिनेमांत अमिताभ बच्चनाक पयली संद मेळ्ळी. हो सिनेमा पडलो. अमिताभाचोय प्रभाव पडलो ना. अमिताभान जेन्ना फिल्म इंडस्ट्रींत पदार्पण केलें तेन्ना देव आनंद, शम्मी कपूर, शशी कपूर, राजेश खन्ना, विनोद खन्ना, राजेंद्र कुमार, धर्मेंद्र, जितेंद्र अशे पेजाद कलाकार आशिल्ले. तांचे मुखार अमिताभ तिगपाक शकतलो काय कितें असो दुबाव आशिल्लो. ताचे सलग सात सिनेमे पडले. तरी लेगीत तो हाल्लो ना.
1973 वर्सा प्रकाश मेहराच्या ‘जंजीर’ ह्या चित्रपटान अमिताभाक खरो ब्रेक दिलो. पुलीस निरिक्षकाची ताची भुमिका खूब लोकप्रीय जाली. ह्या सिनेमा उपरांत ताची ‘एंग्री यंग मॅन’ अशी प्रतिमा निर्माण जाली. पड्ड्याचेर ताणें प्रचलित आशिल्ले समाजीक वेवस्थे आड बंड आनी राग उक्तावपी तरणाट्यांचें चित्रण केलें, देखूनच ताची भुमिका प्रेक्षकांक आवडली. कारण त्या काळार असल्यो भूमिका कमी येताल्यो. उंच, भेदक दोळे, भारदस्त आवाज आनी खाशेले अभिनय शैलीन ताणें प्रेक्षकांच्या काळजाचेर राज्य केलें. रोखडोच तो सुपरस्टार दर्जो मेळोवपाक पावलो.
दिग्दर्शक हृषीकेश मुखर्जीच्या ‘आनंद’ सिनेमांत ताका सुपरस्टार राजेश खन्ना वांगडा काम करपाची संद मेळ्ळी. तिचो ताणें फायदो घेतलो. त्या वर्सा ताका फिल्मफेअर पुरस्कार (उत्कृश्ट सहाय्यक अभिनेतो) मेळ्ळो. ‘नमक हराम’ ह्या चित्रपटांतली ताची भुमिकाय लक्षांत घेवपा सारकी आशिल्ली. अमिताभान 1970 आनी 1980 च्या दशकांत राज्य केलें. दिवार, शोले, अभिमान, कभी कभी, अमर अकबर अँथनी, त्रिशूल, मुकद्दर का सिकंदर, काला पत्थर, डाॅन, नसीब, लावारीस, सिलसिला, नमक हलाल, कुली, शराबी, खुद्दार, सुहाग, मर्द, शहेंनशहा, मर्द, गंगा जमुना सरस्वती, अजुबा, खुदा गवाह, अग्नीपथ अशे एका परस एक सुपरहिट सिनेमा दिले.
राजेश खन्ना सोडल्यार आयज मेरेन खंयच्याच अभिनेत्याक अमिताभ बच्चना इतली लोकप्रियता मेळूंक ना. अमिताभ हो ताच्या काळांतलो सगळ्यांत चड मानधन घेवपी अभिनेतो. आतां मेरेन ताणें 200 परस चड चित्रपटांनी अभिनय केला. तशेंच कांय चित्रपटांनी गायनूय केलां. ‘मिस्टर नटवरलाल’ ह्या सिनेमांतल्या ‘मेरे पास आवो मेरे दोस्तों, एक किस्सा सुनो’ ह्या पदा खातीर ताका फिल्मफेअर पुरस्कार फावो जाला.
1984 वर्सा ताणें राजकारणांत प्रवेश केलो, पूण हो प्रांत आपलो न्हय हें कळटकच ताणें राजकारण सोडलें. 1984 वर्सा ‘कूली’ ह्या सिनेमाच्या शुटींगा वेळार ताका अपघात जालो तरी कोट्यांनी प्रेक्षकांचो आशीर्वाद घेवन अमिताभ परत एक फावट उबो रावलो. ताणें 1996 वर्सा ताणें अमिताभ बच्चन कॉर्पोरेशन लिमिटेड (एबीसीएल) ही निर्मिती कंपनी सुरू केली. पूण ती कोसळ्ळी.
ह्या काळांत ताका व्हड अर्थीक लुकसाण जालें. रिण फारीक करपाक ताणें टीव्ही क्विझ शो ‘कौन बनेगा करोडपती’ चें संचलन केलें. हो क्विझ शो खूबच यशस्वी जालो. आयज अमिताभ 80 वर्सां पुराय करता. तरी तरणाट्यांक लज दिसतली इतली उमेद ताचे कडेन आसा.
ताचे सारको प्रतिभावान कलाकार जिणेंत एक फावट जल्माक येता. भारतांतच न्हय तर संवसारांतय ताचे सारको कलाकार जावंक ना. अमिताभ बच्चनाक वाडदिसाची परबीं दितना दीर्घ आयुश्याची प्रार्थना करतां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
