अभीर, वैष्णवी बुद्दीबळ सर्तींत वस्ताद

भांगरभूंय | प्रतिनिधी

अखील गोंय 11 वर्सां पिराये सकयले राज्य बुद्दीबळ निवड चांचणी सर्तींतल्या उक्त्या गटांत अभीर प्रभून जाल्यार चलयांच्या गटांत वैष्णवी परब हिणें वस्तादपण जोडलें.

लायन्स क्लब ऑफ फोंडा वतीन फोंडें तालुको चेस असोसिएशनाच्या सहकार्यान गोंय बुद्दीबळ अस्थायी समितीचे मान्यतायेन सर्त मंगेशीच्या वागळे हायस्कुलाच्या संकुलांत आयोजीत केल्ली.

उक्त्या गटांत सचित पै, शुभ बोरकार, सरस पोवार, राजवीर पाटील आनी ह्रद्य मोरजकार हांणी जाल्यार चलयांच्या गटांत राचेल परेरा, श्रीवल्ली गांधी, जेनिसा सिक्वेरा, साईजा देसाय, श्रमा मोरुडकार हांणी वळेरेन दुसरी ती सवी सुवात मेळयली.

9 वर्सां पिराये सकयल्या गटांत आर्यव्रत देसाय, एकांग मालवणकार, दिया सावळ आनी रोचेल परेरा हांकां, जाल्यार 7 वर्सां पिराये सकयल्या गटांत आर्यन नायक, रविनिश कामत, त्विषा देसाय आनी अवनी सावयकार हांकां इनामां फावो जालीं.

इनामां भेटवण सुवाळ्याक लायन्स डिस्ट्रिक्ट 317 बीचे जिल्हो गव्हर्नर सुग्गला येलामली, गोंय बुद्दीबळ अस्थायी समितीचे निमंत्रक सचिन आरोलकार, फोंडें तालुको चेस असोसिएशनाचे अध्यक्ष सागर साकोर्डेकार, सचीव अमोघ नमशीकार, लायन्स क्लब ऑफ फोंडाचे अध्यक्ष रामकृष्ण नायक, सचीव चंदन नायक, सर्तीचे आर्बिटर अरवींद म्हामल हे उपस्थीत आशिल्ले.