भांगरभूंय | प्रतिनिधी
मराठी, हिंदी सिनेसृश्टींतले अश्टताशी कलाकार अशोक सराफ आयज 75 वो वाडदीस मनयतात. ते निमतान विशेश….
मराठी फिल्म इंडस्ट्रींतले वरिश्ठ विनोदी कलाकार, जांकां मामा म्हूण सगले पाचारतात, त्या अशोक सराफ हांचो आयज 75 वो वाडदीस. हो विनोदी नटसम्राट 75 वर्सांचो जालो हाचेर विस्वास बसप कठीण जालां, पूण हें खरें. अशोक सराफ हाचो जल्म 4 जून 1947 ह्या दिसा मुंबय जालो. मूळ बेळगांवचे आशिल्ले अशोक सराफ हांचें भुरगेपण मुंबयच्या चिखलवाडी वाठारांत गेलें. ताचें शिक्षण मुंबय जालें. जी. टी शाळेंत. भुरगेपणा सावन तांकां अभिनयाची खूब आवड. पिरायेच्या 18 व्या वर्सा तांणी ययाती आनी देवयानी ह्या नाटकांत विदुषकाची भुमिका केली. ते बँकेंत काम करताले. तांचें अभिनयाचें पिशें पळोवन तांचे मामा नाट्य अभिनेते, दिग्दर्शक गोपीनाथ सावकार हांणी तांकां रंगमाचयेर संद दिली.
अशोक सराफ हांणी दादा कोंडके हांच्या ‘पांडू हवलदार’ ह्या चित्रपटांतल्यान सिनेमाच्या मळार प्रवेश केलो. ह्या चित्रपटांत तांणी केल्ली भ्रश्टाचारी, भितरल्या गांठीच्या हवालदाराची भुमिका खूब लोकप्रीय जाली. दादा कोंडके हांच्याच ‘राम राम गंगाराम’ ह्या चित्रपटांत तांणी मुहंमद खाटीकाची भुमिका केल्ली. कारकिर्दीचे सुरवातीक ताच्यो विनोदी भुमिका लोकप्रिय जावपाक लागल्यो तशी तशी तांकां विनोदी भुमिका मेळपाक लागल्यो. ते भुमिकांक योग्य न्याय दिताले आनी प्रेक्षकांच्या मुखामळाचेर हांसो हाडटाले.
1980 च्या दशकांत सराफ हांचें नांव लक्ष्मीकांत बेर्डे हांचे वांगडा जोडलें. तांचे ऑन स्क्रीन जोडयेन मराठी सिनेमांत अक्षरशः हांसून हांसून बेजार केले. दोगांयनी एकठांय अभिनय केल्ल्या ‘अशी ही बनवाबनवी’, ‘धूमधडाका’ आनी ‘दे दणादण’ ह्या सिनेमांनी खूब येश जोडलें. सचिन आनी महेश कोठारे हांणी दिग्दर्शीत केल्लें आनी अशोक सराफ हांणी मुखेल भुमिका केल्ल्या नवरी मिळे नवऱ्याला, आत्मविश्वास, गंमत जंमत, आयत्या घरात घरोबा, शुभ मंगल सावधान, आई नंबर वन, एक शेर दुसरी सव्वाशेर , नवरा पावशेर, नवसाचा नवरा, आयडीयाची कल्पना हे चित्रपटूय लोकप्रीय जाले.
अशोक सराफ हांणी फकत विनोदी भुमिकेंतच न्हय तर कांय गंभीर भुमिकांतूय आपली जादू दाखयली. वजीर ह्या चित्रपटांत ताणें साकार केल्लो गंभीर राजकारणी लोकांक पसंत पडलो.चौकट राजा ह्या सिनेमांत ताणें परोपकारी मनशाची भुमिका केली. तांचो एक डाव भूताचा, भूताचा भाऊ, शेजारी शेजारी, एक उनाड दिवस, गोंधळांत गोंधळ, सगळीकडे बोंबाबोंब अशा सिनेमांनीय तांणी मुखेल भुमिका केल्यात.
अशोक सराफ हांणी फक्त मराठीच न्हय, तर हिंदी सिनेमांनीय काम केलां. करण अर्जुन, कुछ तुम कहो कुछ हम कहे, बडे घर की बेटी, बेटी नंबर वन, कोयला, गुप्त , संगदिल सनम, प्यार किया तो डरना क्या?, जोरू का गुलाम, खूबसुरत, यस बॉस, सिंघम ह्या सिनेमांतल्यो तांच्यो भुमिका कोण विसरत? तांणी हम पांच, टना टन टन, डोन्ट वरी हो जायेगा, छोटी बडी बाते हे सारक्यो कांय हिंदी टीव्ही माळोय केल्यो. तांचीं हमीदा बाईची कोठी, अनधिकृत मनोमिलन, हे राम, कार्डिओग्राम, सारखं छातीत दुखतंय हीं नाटकांय गाजली.
चित्रपट, टीव्ही, रंगमंच अशा तिनूय माध्यमांतल्यान तांणी अभिनयाचो प्रवास केलो. 200 परस चड सिनेमा. तातूंत तांच्यो नायिका आशिल्ल्यो रंजना, उमा भेंडे, प्रेमा किरण, निवेदिता जोशी, वर्षा उसगांवकार, अश्विनी भावे, अलका कुबल, प्रिया बेर्डे, किशोरी शहाणे आनी हेर. विशेश म्हणजे ह्यो सगल्यो अभिनेत्री तांकां सेटाचेर मामा म्हणटाल्यो. आज तर ते पुराय सिनेसृष्टीचे मामा जाल्यात.
अशोक सराफ हांकां मामा नांव कशें पडलें, तीय एक काणी आसा. एका सिनेमाचे शूटिंगा वेळार कॅमेरामन प्रकाश शिंदे आपले चलयेक घेवन येतालो. ती विचारताली, हो कोण? ताचेर शिंदेन सांगलें, हे अशोक सराफ. पूण तूं तांकां मामा म्हण. सुरवातीक ती ल्हान चली आनी उपरांत सगलेच अशोक सराफ हांकां मामा म्हणपाक लागले. अशोक सराफ हांकां अभिनया खातीर जायते पुरस्कार मेळ्ळ्यात. पूण ते सांगतात, रसिकांच्या मनांत हांव जागो घेवपाक शकलों, होच म्हजे खातीर सगल्यांत व्हडलो पुरस्कार. ते म्हणटात तें खरें. हालींच्या काळांत रसिकांनी अशोकमामाचेर जितलो मोग केलो, तितलो कोणाचेर करूंक नासतलो. पांच दशकां तें रसिकांच्या मनांत अढळ स्थान मेळोवन आसा. अशोकमामा हे गोंयचे भाचे. तांच्या 75 व्या वाडदिसा निमतान तांकां परबीं.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
