अपात्रताय याचिकेचेर न्यायालय सभापतीक निर्देश दिवंक शकना

भांगरभूंय | प्रतिनिधी

सभापतींचे खंडपिठाक प्रतिज्ञापत्र सादर

पणजी : सभापती हें घटनात्मक पद आशिल्ल्यान न्यायालय तांकां निर्देश दिवंक शकना अशें प्रतिज्ञापत्र सभापतीन खंडपिठांत सादर केलां. गिरीश चोडणकार हांचे याचिकेचेर शुक्रारा सुनावणी जाली. काँग्रेसीच्या 8 आमदारांनी भाजपांत प्रवेश केल्ल्यान प्रदेश काँग्रेसीचे आदले अध्यक्ष गिरीश चोडणकार हांणी खंडपिठांत दाखल केल्ल्या याचिका प्रकरणांतली सुनावणी 10 मार्च मेरेन फुडें धुकल्ल्या.

अपात्रताय याचिकेचेर 3 म्हयन्यांत सुनावणी पुराय करून निवाडो दिवपाचो आदेश सभापतींक दिवपाची मागणी याचिकादार गिरीश चोडणकार हांणी केल्या. हे याचिकेचेर सुनावणी जाली. गिरीश चोडणकार हांचे सयत अपात्रताय याचिकेच्यो आनीक दोन याचिका आसात. ह्या याचिकांचेर सुनावणी सुरू आसा. गिरीश चोडणकार हांचे याचिकेचेर बेगिनूच सुनावणी सुरू जातली, अशें सभापतींनी प्रतिज्ञापत्रांत स्पश्ट केलां. प्रतिवादी आमदारांनी प्रतिज्ञापत्र सादर करपा खातीर दोन सप्तकांचो वेळ मागला.

सप्टेंबरांत काँग्रेसीच्या 8 आमदारांनी भाजपांत प्रवेश केल्लो. काँग्रेसीच्या 8 आमदारांनी दोन तृतीयांश गट तयार करून तो भाजपांत विलीन केलो. सभापती रमेश तवडकार हांणी ह्या विलिनीकरणाक मान्यताय दिली. दिगंबर कामत, मायकल लोबो, राजेश फळदेसाय, डिलायला लोबो, आलेक्स सिक्वेरा, केदार नायक, रुडॉल्फ फर्नांडीस आनी संकल्प आमोणकार ह्या 8 आमदारांनी भाजपांत प्रवेश केल्लो. ह्या आमदारांचे पक्षांतर घटनेक धरून ना. पक्षांतराची प्रक्रिया योग्य तरेन जावंक नाशिल्ल्यान तांकां अपात्र करचे अशी मागणी गिरीश चोडणकार हांणी केल्या. सभापती रमेश तवडकार हांचे कडेन तांणी अपात्रताय याचिका दाखल केल्या. तशेंच गिरीश चोडणकार हांचे सयत हेर दोन अपात्रताय याचिका सभापती कडेन आसात. सभापतींनी हेर दोन अपात्रताय याचिकेचेर सुनावणी घेवपाक सुरवात केल्या.

अपात्रताय याचिकेचेर सुनावणी घेवन निवाडो दिवपाक सभापती कळाव करतात. तीन म्हयन्या भितर सुनावणी पुराय करून निवाडो दिवपाचो ​आदेश खंडपिठान सभापतीक दिवचे, म्हूण चोडणकार हांणी आतां खंडपिठांत याचिका दाखल केल्या.

हाचे पयलीं लेगीत काँग्रेसीच्या आमदारांनी भाजपांत प्रवेश केल्लो. हे आमदारां आड लेगीत अपात्रताय याचिका दाखल जाल्ल्यो. सभापतींनी पयलींच्याे अपात्रताय याचिका भायरायल्यात.