अपघात अाडावपाक उपाय येवजण्यो

भांगरभूंय | प्रतिनिधी

येरादारी, बांदकाम, गृह खातें करतले कार्यवाहीः मुख्यमंत्री

भांगरभूंय I प्रतिनिधी
पणजी : राज्यांतल्या वाडट्या रस्तो अपघातां विशीं हुस्को उक्तायतना अपघातांचेर नियंत्रण दवरपाक संबंदीत खात्यां वरवी उपाय येवजण सुरू आशिल्ल्याचे मुख्यमंत्री डॉ. प्रमोद सावंत हांणी सांगलें. मंत्रीमंडळ बसके उपरांत ते पत्रकार परिशदेंत उलयताले. ह्या वेळार येरादारी खात्याचे मंत्री मॉवीन गुदिन्हो हाजीर आशिल्ले.

लोकसंख्येच्या प्रमाणात राज्यांत वाहनांचो आंकडो चड आसा. वाहनांचें प्रमाण वाडत आशिल्ल्यान अपघातांनी वाड जाल्या. बरेच जाण येरादारी नेमांक पाळो दिनात. सोऱ्याचे घुंवळेंत वाहन चलोवपाचो प्रकार हो हुस्क्याचो विशय आसा. फुडलें वाहन पळय नासतना जायते जाण अोव्हरटेक करपाक वतात. लोकांनी सहकार्य करपाची गरज आसा. अपघातांचेर नियंत्रण हाडपा खातीर भौशीक बांदकाम खातें, येरादारी खातें आनी गृह खात्याची जोड बसका सुरू आसा. अपघातांचेर नियंत्रण हाडपा खातीर उपाय येवजण सुरू केल्यात, अशें मुख्यमंत्र्यान सांगलें.
गोंय विधानसभेचे अर्थसंकल्पी अधिवेशन 27 मार्च सावन सुरू जातलें. एक सप्तकाचें हे अधिवेशन आसतलें. अधिवेशनाक मान्यताय दिल्ल्याचे मुख्यमंत्री डॉ. प्रमोद सावंत हांणी सांगलें. गोंय राज्य सौर उर्जा धोरण 2017 त दुरुस्ती करपाक मान्यताय दिल्या. हेडगीं गोरवां वेवस्थापन येवजणे खातीर दोन वाहनांची खरेदी करपाचो निर्णय जाला. सभापती कार्यालयाक आनीक दोन कर्मचाऱ्यांची भरती करपाक मान्यताय दिल्या. हाका लागून सभापती कार्यालयांतल्या कर्मचाऱ्यांचो आंकडो 16 वयल्यान 18 जातलो.
म्हापश्यां खासा भुरग्यांच्या आस्था विद्यालया खातीर हरकत ना दाखलो तशेंच परवानाे शुल्कांतल्यान मेकळीक दिवपाचो निर्णय मंत्रीमंडळान घेतला. मुख्यमंत्री डॉ. प्रमोद सावंत हांणी मंत्रीमंडळ निर्णयांची म्हायती दिली.
मंत्रीमंडळान हेर काय ल्हान निर्णय घेतल्यात.
मानसोपचार चिकित्सा संस्थेंत (आयपीएचबी) क्लिनिकल सायकोलॉजिस्टाची दोन पदां तशेंच सरकारी तंत्रनिकेतनांत फुड टेक्नोलॉजी विभागांत एका तंत्रज्ञाचे नेमणुकेक मान्यताय मेळ्ळ्या. गोंय राज्य सहकार कायदो 2001त दुरुस्तीक मान्यताय मेळ्ळ्या.
सत्तरीतल्या चार पंचायतींक कोयर एकठांय करपा खातीर जमीन हस्तांतरीत करपाक मान्यताय दिल्या.