भांगरभूंय | प्रतिनिधी
-वाहन अपघात भरपाय लवादाचो विमो कंपनीक आदेश
पणजी: मेरशेंच्या पणजी-पोरणें गोंय बायपास रस्त्याचेर फ्लायओव्हरा लागसार 2017 त दुचाकी आनी टँकर हांचे मदीं जाल्ल्या भिरांकूळ अपघातांत दुचाकी चालक माहिरुनिसा बी नायक हिका मरण आयिल्लें. ह्या अपघाताक तो 6 टक्के जापसालदार आशिल्ल्याचे निरिक्षण नोंद करून ताच्या कुटुंबियांक 40 टक्के दरान 9 टक्के कळंतरा सयत 8.9 लाख रुपयांची विमो भरपाय दिवची, असो आदेश वाहन अपघात भरपाय लवादाचे अध्यक्ष न्या. शेरीन पॉल हांणी दिलाे.
पोरणें गोंय पुलिसांनी अपघात प्रकरणांत गुन्यांव दाखल केल्लो. ते प्रमाण 10 जुलय 2017 त रातीं 9 वरांचेर दुचाकी चालक माहिरुनीसा बी नायक पणजेच्यान पोरणें गोंया जाल्यार टँकर पणजीचे दिशेन येतालो. वयले सुवातेर पावले उपरांत दुचाकी चालकान दुसऱ्या एका वाहनाक अोव्हरटेक करपाच्या नादांत ताचें दुचाकी वयलें नियंत्रण सुटले आनी मुखा वयल्यान येवपी टँकराक नेटाचो धपको दिलो. त्या वेळार थंयच तिका मरण आयलें. ह्या प्रकरणांत पोरणें गोंय पुलिसांनी चालक टँकर चालका आड गुन्यांव दाखल करून ताका अटक केल्लो. उपरांत ताची जामिनाचेर सुटका जाल्ली.
ह्या अपघात प्रकरणांत दुचाकी चालकाचो पूत यासीन मोहम्मद आराफात नायक, धूव आफिया मोहम्मद नायक ह्या दोगांयनी मोटार वाहन लवादा कडेन खटलो दाखल करून लुकसाण भरपाय दिवपाची मागणी केल्ली. तातूंत तांणी टँकर धनी सषमा हरी नायक, ओरिएंटल विमो प्रा. कंपनीक प्रतिवादी केल्ले.
अपघातांत मरण आयिल्लो दुचाकी चालक पोरणें गोंयच्या एका शाळेंत शिक्षक म्हूण सेवेंत आशिल्लो. त्या वेळार ताका म्हयन्याक 9,500 रुपया पगार आशिल्लो. ते प्रमाण भुरग्यांनी 24 लाख 65 हजार रुपयांची लुकसाण भरपायेचो दावो केल्लो. जाल्यार दुचाकी चालकान दुसऱ्या वाहनाक अोव्हरटेक करपाच्या नादांत आपली दिशा सोलून टँकराक धपको दिल्ल्याचो दावो टखकर धनयान केलो.
ह्या प्रकरणांत साक्ष आनी हेर पुराव्याची दखल घेवन लवादान वयले निरिक्षण नोंद करून दुचाकी चालकाच्या कुटुंबियांक लुकसाण भरपाय दिवपाचो आदेश जारी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
