भांगरभूंय | प्रतिनिधी
स्पीड रडार गन, इंटरसेप्टर वाहनां, अल्कोमिटराचाे आस्पाव
भांगरभूंय I प्रतिनिधी
पणजी : अपघातांचें प्रमाण उणें करपा खातीर येरादारी खातें आतां रस्तो सुरक्षा वेवस्थापनाचेर भर दितले. वाहनांच्या गतीचेर नियंत्रण दवरपी इंटरसेप्टर वाहनां, रडार गन, अल्कोमिटर हांचे खरेदी खातीर 1 कोटी 81 लाख रुपयांक मान्यताय मेळ्ळ्या. येरादारी संचालक राजन सातार्डेकार हांणी ही म्हायती दिली.
राज्यांत अपघातांचें प्रमाण वाडत आसा. फाटल्या सप्तकांत दर दिसा अपघात जाले. आयतारा नव्या जुवारी पुलाचेर अपघात जावन एकल्याक मरण आयलें. नव्या जुवारी पुलाचेर आयतारा पयलो बळी गेलो. येरादारी खात्यान आतां रस्तो सुरक्षेचेर भर दिला.
वाहनांच्या गतीचेर नदर दवरपा खातीर इंटरसेप्टर वाहनां खरेदी करपाचो निर्णय येरादारी खात्यान घेतला. हाचे खातीर 68 लाख रुपया मंजूर जाल्यात. दरेकी 23 लाख रुपयांची 3 इंटरसेप्टर वाहनांची खरेदी जातली. ही वाहनां पुलिसांच्या ताब्यांत दितले. उत्तर आनी दक्षीण गोयांत दरेकी एक जाल्यार एक पुलीस मुख्यालयांत एक वाहन आसतले. रडार गन, स्क्रीन, अल्कोमिटर ह्यो सुविधा इंटरसेप्टर वाहनांत आसतल्यो. वाहनांचो खर्च 7.65 लाख जाल्यार वाहनांतल्या उपकरणांचो खर्च 15 लाख आसतलो. एका इंटरसेप्टर वाहनांचेर 22.65 लाख रुपया खर्च जातले.
सोरो पियेवन वाहन चलोवप्यांची तपासणी करपा खातीर 50 अल्कोमिटरांची खरेदी जातली. एक अल्कोमिटराचो 49 हजार खर्च आशिल्ल्यान हाचेर 24.50 लाख रुपया खर्च जातले.
तशेंच कदंबा म्हामंडळा खातीर 20 अल्कोमिटरांची खरेदी जातली. हाचेर 9.80 लाख रुपया खर्च जातले.
8 स्पीड रडार गनांची खरेदी जातली. एका रडार गनाचो खर्च 9.95 लाख आशिल्ल्यान हाचेर 80 लाख रुपया खर्च जातले. रस्तो सुरक्षे खातीर जो निधी आसता, तातूंल्यान 1 कोटी 81 लाख रुपया उपकरणां खरेदी करपा खातीर मंजूर जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
