भांगरभूंय | प्रतिनिधी
बार धनी संघटणाः येरादारी मंत्र्यांची शिटकावणी अवेव्हार्य
पणजी : रस्तो अपघात कित्याक घडटात? रस्तो अपघातांचीं कारणां कितें?, हाचो अभ्यास करून सरकारान उपाय येवजण करपाची गरज आसा. अपघाता खातीर बार धनयांक जापसालदार धरून सोरो पियेल्ल्या गिरायकांक रातीं घरा पावोवपाची जापसालदारी बार धनयाचेर दिवप अयोग्य आसा. अखील गोंय बार धनी संघटणेचो हाका विरोध आसा, अशें संघटणेचे अध्यक्ष मायकल कारास्को हांणी सांगलें.
मुख्यमंत्री डॉ. प्रमोद सावंत हांची भेट घेवन मागण्यां सयत सुचोवण्यो संघटणे वतीन सादर करतले, अशें तांणी सांगलें.
राज्यांत अपघातांचें प्रमाण वाडत आसा. सोरो पियेवन वाहन चलयिल्ल्यान चड अपघात घडटात. सोरो पियेवन वाहन चलोवपाचेर नियंत्रण दवरपाची गरज आसा. तशेंच रातच्या वेळार सोरो पियेल्ल्या गिरायकांक घरा पावोवपाची जापसालदारकी बार धनयांची आसा. बारा भायर टॅक्सी दवरची. टॅक्सींत बसोवन सोरो पिवपी गिरायकांक घरा पावोवपाची जापसालदारकी हाचे फुडें बार धनयांची आसतली. येरादारी नेमात ही दुरूस्ती करपाचो प्रस्ताव आशिल्ल्याचे येरादारी मंत्री मॉवीन गुदिन्हो हांंणी स्पश्ट केलांं. रस्तो सुरक्षा सप्तकाचे कार्यावळीचें उक्तावण करतना तांणी ही शिटकावणी दिल्या.
वाडट्या अपघातांचेर नियंत्रण दवरपा खातीर नेम खर करपाचे येरादारी मंत्र्यांनी स्पश्ट केला. सोरो पियेल्ल्या गिरायकांक घरा पावोवपाची जापसालदारकी बार धनयांचेर सोपोवपाक बार धनयांनी आक्षेप घेतला. ही सुचोवणी अवेव्हार्य आसा, अशें संघटणेच्या अध्यक्षांनी म्हणलां.
गोंयकार भाव शिस्तीत सोरो पियेयतात. बरेच जाण बार धनयांच्या वळखीचे आसतात. पर्यटक तशेंच भायले लोक प्रमाणा भायर सोरो पियेतात. सगले जाण बार्रान पियेतात अशे ना. भायल्यान सोरो हाडून हॉटेलांतल्या कुडींनी ते सोरो पियेतात आनी गाडी चलयतात. हाचेर नियंत्रण कोण दवरतलो? बऱ्याच पर्यटकांच्या गाडयांक अपघात जाला.
रस्त्यांचेर सारके स्पीडब्रेकर ना. सुचोवणी तकटे ना. रस्तो दुरुस्तीच्या कामांत शिस्त ना. येरादारी नेमांची कार्यवाही सारकी जायना. सरकारान पयलीं रस्ते दुरूस्त करचे. नेमांची खर कार्यवाही करची. रातची चालकांची तपासणी करून पियेल्ल्या चालकांचेर दंडात्मक कारवाय करची. ह्यो सगल्यो गजाली करप सरकार तशेंच पुलिसांक शक्य आसा. अपघातांच्या कारणां कडेन लक्ष दिनासतना बार धनयांचेर बोट दवरप चुकीचें.
कोरोना म्हामारी काळांत बार्रां बंद आशिल्लीं. बार्रांच्या धनयांक बरेच अर्थीक लुकसाण जालें. अबकारी शुल्कांत सवलत दिवपाची मागणी केल्ली. ही मागणी अजून पुराय जावंक ना, अशें अध्यक्ष मायकल कारास्को हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
