अनधिकृत बांदकामां नियमीत करपाची येवजण परतून चालीक

भांगरभूंय | प्रतिनिधी

दुरुस्ती विधेयक विधानसभेंत सादर, अर्ज करपाक 90 दिसांची मुजत

पणजी : अनधिकृत बांदकामां नियमीत करपा खातीर ‘गोवा अनधिकृत बांदकाम नियमन (दुरुस्ती) विधेयक मंगळारा विधानसभेंत मांडलें. विधानसभेंत विधेयकाक मान्यताय मेळ्ळे उपरांत दुरुस्ती कायदो अधिसुचीत जाले उपरांतच्या फुडल्या 90 दिसांत नागरिकांक अनधिकृत बांदकामां नियमीत करून घेवपाक अर्ज करचो पडटलो. कायद्या खाला 28 फेब्रुवारी 2014 पयलीं बांदिल्ल्या घरांकूच नियमीत करपाक मेळटलीं.
सोमारा मंत्रीमंडळान मान्यताय दिल्लें ‘गोवा अनधिकृत बांदकाम नियमन (दुरुस्ती) विधेयक’ मंगळारा विधानसभेंत सादर केलें.
विधानसभेंत दुरुस्ती कायदो संमत जावन अधिसुचीत जाले उपरांत नागरिकांक अर्ज करपाक 90 दीस दिल्यात. ताका लागून आतां 2016त हो कायदो अस्तित्वांत आयले उपरांत दिल्ले मुजतींत जांणी अनधिकृत बांदकामांक नियमीत करपाक अर्ज करूंक नाशिल्ले, अशा नागरिकांक व्हड संद मेळ्ळ्या. हो दुरुस्ती कायदो अधिसुचीत जाले उपरांत ज्या व्यक्तींनी सुरवातीक नमूद केल्ल्या काळांत अर्ज करूंक नाशिल्ले, तांकां फुडल्या 90 दिसांत अर्ज करपाक मेळटलो.
गोवा अनधिकृत बांदकाम नियमत कायद्याक 2016त पयलीं मान्यताय दिल्ली. त्या वेळार ह्या कायद्या खाला अर्ज करपाक 180 दिसांची मुजत दिल्ली. ही मुजत 18 सप्टेंबर 2018त सोंपलीं. ते उपरांत आनीक 30 दिसांची मुजत वाडयिल्ली. ती 18 ऑक्टोबर 2018त सोंपिल्ली. ह्या कायद्या खाला अनधिकृत बांदकामां नियमीत करून घेवपाचें आवाहन आदल्या सरकारान लोकांक केल्लें. ते खातीर अर्ज करपाची मुजत दोन खेपे वाडयिल्ली. ते प्रमाण जायत्या नागरिकांनी अर्ज करून आपली अनधिकृत बांदकामां नियमीत करून घेतिल्ली. पूण जायत्या जाणांक त्या काळांत संदीचो लाव घेवपाक मेळूंक ना. सरकारान ह्या कायद्यांत दुरुस्ती करची, अशी मागणी नागरिकांनी सरकारा कडेन केल्ली. ते खातीर सरकारान विधानसभेंत हे विशींचो दुरुस्ती कायदो मंजूर करून घेवन अर्जा खातीर परतून मुजत दिवपाचो आनी नागरिकांक अनधिकृत बांदकामां नियमीत करून घेवपाची संद दिवपाचो निर्णय घेतिल्लो.
शिंयाळ्या अधिवेशनाच्या पयल्याच दिसा (सोमारा) जाल्ले मंत्रीमंडळ बसकेंत दुरुस्ती विधेयकाक मान्यताय दिली. ते उपरांत हें विधेयक मंगळारा विधानसभेंत सादर केलें. विधानसभेंत सत्ताधारी भाजपा कडेन भोवमत आशिल्ल्यान फाल्या वा परवा कायद्याक मंजुरीय मेळटली.