अणभवांतल्यान आयिल्लीच कविता वाचकांक आपली कशी दिसता

भांगरभूंय | प्रतिनिधी

डॉ. प्रवीण सावंतः कोकण मराठी परिशद, गोंय वतीन दिवचले रंगलें भोवभाशीक कविसंमेलन

दिवचलः कविच्या जिवितांतल्या अणभवांतल्यान आयिल्लीच कविता साबार वाचकांक आपली कशी दिसता. एकाद्या झाडां पोंदा बसून कवी चंद्र, नखेत्रांच न्हय जाल्यार सुर्या मेरेन पावता आनी उण्यांत उण्या उतरांतल्यान व्हड आशय कवितेंतल्यान उक्तायता. ताका कवी हो सदांच सर्वोत्कृश्ट कल्पना शक्तीचो लेखक आसा, अशें कवी तशेंच दिवचलच्या झांट्ये म्हाविद्यालयांतले प्राध्यापक डॉ. प्रवीण सावंत हांणी सांगलें.

कोकण मराठी परिशद, गोंय वतीन देवकीनगर बोड्डें दिवचलच्या शिवगड संकुलांत भोवभाशीक कविसंमेलन आयोजीत केल्लें. ताचें उक्तावण केले उपरांत प्रा. सावंत उलयताले.

ह्या वेळार माचयेर कविसंमेलनाची अध्यक्ष मुळगांवच्या ज्ञानप्रसारक उच्च माध्यमीक विद्यालयाची शिक्षक प्रा. स्नेहा सुतार, कोमपचे अध्यक्ष सुदेश आर्लेकार, कार्यवाह अक्षता किनळेकार, काव्यसंधया उपक्रमाची संयोजक शितल साळगांवकार, दिवचलचे विनोदी कथाकार ॲड. मुकुंद मळीक आनी साहित्यीक म. कृ. पाटील हाजीर आशिल्ले.

आयचे तरणाटे हाताभायर वतात, साहित्या पासून पयस वतात, अशी टिका सदांच जाता. पूण कोमपच्या कविसंमेलनांत एक वेगळेंच आनी वयलें विधान चुकीचें थारावरी सकारात्मक चित्र दिसलें. समाजांत दिलपी विवीध समस्यांचेर, प्रस्नांचेर विचार करून संवेदनशील युवा मनां कवितेंतल्यान अभिव्यक्त जातात, तें पळोवन खोस भोगता, अशें स्नेहा सुतार हांणी सांगलें.

ह्या संमेलनांत स्नेहा सुतार, साधना आरोंदेकार, गौरी नाडगौडा, मीना कानोळकार, सायली गर्दे, मुकुंद मळगांवकार, विठ्ठल भगत, प्रकाश शिरोडकार, डॉ. प्रवीण सावंत, शितल साळगांवकार, शुभा घोडगे, गौतमी चोर्लेकार, अनिष्का गावडे, सुरेखा देसाय, मुकुंद मळीक, विनायक तिवरेकार, सोनिया घाडी, धनश्री जाधव, वनिता मयेंकार, तृप्ती बांदेकार, सविता सामंत, सई भाटे हांणी कविता सादर केल्यो.

ॲड. मुकुंद मळीक हांणी प्रास्तावीक केलें. सुदेश आर्लेकार हांणी येवकार दिलो. कवि संमेलनाची निमंत्रक धनश्री जाधव हांणी उपकार मानले. कोमपची कार्यवाह अक्षता किनळेकार हांणी सुत्रसंचालन केलें.

पाडुरंग आरोंदेकार, दिनानाथ तारी, जितेंद्र नाटेकार, रुपा मळीक, सोमनाथ मळीक ह्या वेळार हाजीर राविल्ले. ह्या कविसंमेलनांत कोंकणी, मराठी आनी हिंदी भाशेंतल्यो कविता सादर केल्यो. तातूंत युवा कवी- कवयित्रींनी व्हड संख्येन वांटो घेतिल्लो.