भांगरभूंय | प्रतिनिधी
सुदिन ढवळीकारः 1200 कोटींचे घालतले उच्च दाबाचे वीज केबल
भांगरभूंय । प्रतिनिधी
मडगांवः गोंयांतली वीज समस्या सोडोवचे खातीर 1200 कोटी रुपया खर्च करून उच्च दाबाच्यो वीज केबल घालतले. ते काम पुराय जाले उपरांत राज्यांतली विजेची चडशी समस्या सुटावी जातली. ते उपरांत सबस्टेशन अपग्रेडेशन करतले. फुडल्या अडेज वर्सां भितर गोंयचो विजेचो प्रस्न सासणाचो सोडयतलों, अशें आस्वासन वीज मंत्री सुदिन ढवळीकार हांणी दिलें. ते मडगांवां पत्रकारां कडेन उलयताले.
गोंयांत सगळ्या वाठारांनी उच्च दाबाचे वीज केबल भुंयगत पद्दतीन घालतले. ताका लागून वीज समस्या 90 टक्के उणी जातली. उण्या दाबाच्या वीज सरयांक लागून वीज प्रस्न 10 टक्के उरूं येता. वेर्णें उपकेंद्राच्या भुंयगत वीज केबलां खातीर 350 कोटींची निविदा काडपाची फायल मंजूर केल्या. ती वित्त विभागा कडेन मंजुरी खातीर धाडल्या. फुडल्या 15 दिसां भितर त्या निविदांचे फायलींक मंजुरी मेळ्ळे उपरांत वेर्णें सयत दक्षीण गोंयांतलो अर्दो भाग सुदरतलो. ते भायर 65 एमव्हीए ट्रान्सफोर्मर उबारले उपरांत उद्देगीक वसणुकेक वचपी वीज केबलांतलो उणो चड दाबाचो प्रस्न सुटावो जातलो, अशें ढवळीकार हांणी सांगलें.
कुंकळ्ळी वाठारांतली सोडोवचे खातीर कुंकळ्ळी उपकेंद्र अपग्रेडशना खातीर घेतलां. काणकोण वाठारांत 200 कोटींचीं उच्च दाबाच्यो भुंयगत वीज केबलाचीं कामां करतले. ते उपरांत जंय चड उपकेंद्रांची गरज लागतली थंय उपकेंद्रां उबारतले. ते बायर भुंयगत वीज केबलाचें काम पुराय जाले उपरांत रस्त्या कुशीच्या उक्त्या पॅनलांचोय प्रस्न सोडयतले, अशें ढवळीकार हांणी स्पश्ट केलें.
गोंयांत 1965 त घातिल्ल्यो वीज सरयो बदलपाचो यत्न कोणेच करूंक ना. तातूंत शार वाठार सोडचो पडटलो. मडगांव, पणजी, म्हापशें शारांतलो कांय वाटार आनी जंय वीज समस्या उप्रासल्यात थंयच्यो वीज सरयो बदल्ल्यात, पूण गांवांतल्यो वीज सरयो आनी कंडक्टर बदलपाक कोणेच लक्ष दिवंक ना, अशें ढवळीकार हांणी सांगलें.
2030 मेरेन 50 मेगावॅट निर्मितीची मोख
गोंयांत वीज निर्मिती करचे खातीर 1965 सावन आतां मेरेन एकाय राज्य सरकारान कसलींच पावलां उखलूंक नात. आतां मुख्यमंत्री डॉ. प्रमोद सावंत हांच्या फुडारपणा खाला आनी केंद्र सरकाराच्या आदारान गोंयांत वीज निर्मितीचो यत्न चल्ला. सौर उर्जा निर्मिती सयत हेर वीज निर्मिती प्रकल्पांतल्यान 2030 मेरेन 50 मेगावॅट निर्मिती करपाची मोख दवरल्या. गोंयांत वीज निर्मिती करतले, अशें मंत्री सुदिन ढवळीकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
